Tura, Ïaïong 10
Ka Election Commission of India (ECI) ka la pynkynriah kam ïa u Superintendent of Police (SP) ka North Garo Hills, u Bruno A. Sangma lyngba ka hukum kaba la pynmih ha ka Sngi Balang.
Ha jaka u Bruno la bujli da u Abraham T. Sangma, Commandant ka 2nd MLP Battalion.
Ha ka hukum ba la pynmih da u Secretary ka ECI, u Santosh Kumar Dubey sha u Chief Electoral Officer, Meghalaya, katei ka hukum ka ong ba ka Commission ka la pyrkhat halor ka thup ophisar ba la tyrwa da ka tnad kam pohïing ka Sorkar Jylla bad mynjur ïa ka kyrteng u Abraham T. Sangma.
Ha kajuh ka por, la bthah ïa u Abraham T. Sangma ban pynïasoh noh mar-mar sha ka kam.
Ka jingbujli ïa u SP ka North Garo Hills, u Bruno A. Sangma ka la wan hadien ka jingujor kaba la ujor sha ka ECI, kaba kdew ba utei u ophisar u ïadei bahaïing bad ka kyrtong ka NPP bad MP ka Tura, ka Agatha K. Sangma bad kan long pyrshah ïa ka rukom ïaid beit ïaid ryntih jong ka ilekshon kaba khuid bad suba.
U Bruno Sangma u dei shi kynum bad u kurim ka Agatha.
