Nongstoiñ, Ïaïong:
Ha ka Sngi U Blei jong ka taïew, ka St. John Mary Vianney Parish Nongkasen ka la ïoh ban sei biang sa uwei u Lyngdoh Sohblei uba dei uwei na ki Dikon jong ka Balang uba la tip kum u Dikon Desing John Nongphud, CSC.
Ha katei ka sngi, ïa utei u Dikon la ïoh ban pynkyntang Lyngdoh noh lyngba ka jinglehniam da u Lyngdoh Sad ka Nongstoiñ Jyllaniam u Most Rev Wilbert Marweiñ (Bishop) ïa kaba la pynlong ha St. John Mary Vianney Parish Nongkasen.
Ha katei ka sngi la sakhi lang ïa katei ka sngi da ki hajar ngut ki riewngeit ka Balang Katholik kiba la wan sha katei ka sngi kyrpang jong ka Balang.
U Lyngdoh Sohblei bathymmai kata u Phadar Desing John Nongphud u dei u khun jong ka Kong Mistoril Nongphud bad u Bah Twosstar Peiñlang na ka shnong Tiehsaw Khyllem bad u dei u khun ba 4 napdeng 9 ngut shipara.
Ym tang katta, ha katei ka sngi la ïoh ruh ban rakhe lehkmen ïa ka jubili rupa jong ka jingkynjoh sha u mawmer ba 25 snem jong ka Parish.
Shuh shuh ha katei ka sngi la sdang ïa ka jinglehniam da ka proseshon jong ki Lyngdoh bad u Lyngdoh Sad u la ïoh ban pyndep ïa ki niam ki rukom naduh kaba pynsleh da ka umphniang, ban pynsmai, ban pynkhamti ïa ka khuri jong ka Sakrament Bakhuid sha u Phadar Desing John Nongphud bad kiwei kiwei jinglehniam.
Hadien kata, ki kmie ki kpa bad ki bahaïing hasem jong u Lyngdoh thymmai ki la ïoh ban pynphong ïa ka jaiñphong ki Lyngdoh ïa la u khun.
Hadien katei, u Phadar Desing John Nongphud u la ïoh ban shim ïa ki jingtyrwa bad u la ïashimbynta lang ryngkat u Lyngdoh Sad ban pyndep ïa ka jingkñia ïa ka Mass Bakhuid.
Ha ka jingïaseng nohphai sngi pat u Lyngdoh Sohblei bathymmai u la ïoh ban pyndep ïa ka jingmane Sakrament Bakhuid bad kyrkhu pynwai.
Ha katei ka sngi la ïadonlang ruh u Phadar John Albert Ryntathiang Parish Priest ka Nongkasen Parish, Phadar Anselm Nonglang Vicar General, bad kiwei kiwei ki sister ki brother bad ki riewngeit kiba wan na ki shnong bapher bapher ban wan sakhi lang ïa katei ka sngi rakhe jubili rupa bad sngi Pynkyntang Lyngdoh Sohblei jong ka St. John Mary Vianney Nongkasen Parish.
