Bengaluru, ïaïong:
Uwei u briew uba la bat ïa ka pistol ha ka Lah Sngi U Blei u la leit hajan u Myntri Rangbah jong ka Karnataka u Siddaramaiah kaba u dang don ha ka kali kaba plie jingkhang, bad pyndeng syntiew ha ryndang ïa u Myntri ka tnat Transport u Ramalinga Reddy uba la ïeng hajan jong u.
Kane ka jingjia ka la jia ha Bhairasandra ha ka sorbah ba u Siddaramaiah u la dei ban ïalap ilekshon na ka bynta ka khun jong u Reddy bad ka kyrtong jong ka seng Congress ka ban ïakhun ïa ka ilekshon Lok Sabha ka Sowmya Reddy.
Une u briew, ha kaba ki pulit ki la ïathuh ba u dei uba la tip kyrteng kum u Riyaz, kynsan kynsan u la kiew ha ka kali ha ryngkat ka suloi ba la buh ha ka shadem jong u.
Ha ryngkat ka jingkren ïa ki kyntien ban ai jingkyrshan ïa ka seng Congress, u Riyaz u la pyndeng syntiew ha ryndang u Reddy, ha ka khun jong u ka Sowmya bad kiwei pat.
Haba u la hiar na ka kali, u Siddaramaiah bad kiwei pat ki la ïohi ïa ka suloi.
Ki pulit ki la ïathuh ba u Riyaz u la ju rah ïa ka suloi jong u naduh ki por ba la don kiba byrngem pynïap ïa u ha ki snem ba la leit bad u la shah map ha ka ban leit aiti ïa ka suloi jong u ha kane ka por ban pynlong ilekshon.
Ha ka jingthoh kaba la paw pyrthei lyngba ka rynsan phah khubor ha ‘X’ ka seng BJP ka la kynthoh pyrshah ïa u Myntri Rangbah, ha kaba ka la ong ba kane ka la pynpaw shai ba kito kiba ju pyndeng syntiew ïa u Siddaramaiah ki dei ki runar, ki ehrang, bad ki riewshang surok.
“Ki ehrang ïa kiba la ju ïohi ha ki poster jong ki jingrakhe sngikha, mynta ki la pyni ha ki dur hakhmat ki paidbah ha ryngkat ki suloi jong ki bad leit pyndeng syntiew ïa u Myntri Rangbah bad ïa u Symbud Myntri Rangbah ha ki jingïalang paidbah. Wat lada ïa ka Model Code of Conduct la pyntreikam, kine ki dang ïohlad ban rah ïa ki suloi bad ki la leh ïa kane ban pyntieng pynsyier bad byrngem ïa ki nongthep vote ha kane ka thaiñ,” la ong ka seng.
