Shillong, Ïaïong 10
Ka khubor na ki pulit ha ka Sngi Balang ka la ïathuh ba ka la don kawei ka trok kaba la shah thang ha Mawthungkper, West Khasi Hills, bad ka jingjulor na kane ka jingjia ka la kot sha kumba T. 65 lak eiei bad u nongñiah ruh u la mynsaw.
Ki pulit ki la ong ba u Angbinus Pariong u la ujor ba ha ka 6 tarik Ïaïong ha ka por kumba 2 baje mynstep, ki runar kiba la don kumba 18 haduh 20 ngut eiei ki la kawang maw ïa ka trok jong u kaba la pynïeng. Ha kajuh ka por, la ong ba kita ki runar ki la khang ïa ka jingkhang jong ka trok kaba ma u, u dang don hapoh jong ka trok, bad ha kajuh ka por ki la thang ïa ka trok jong u. Hadien kata, kitei ki runar ki la phet krad noh na katei ka jaka. Hynrei, u Angbinus, uba dei u nongñiah jong ka trok, u la lait phet napoh jong ka trok, hynrei u la mynsaw. La ong ba ka jinglut na ka daw jong katei ka jingshah thang ka la kot sha kumba T. 65 lak eiei.
Ha kawei pat ka jingjia, u Starday Kharjana u la ujor ba ha ka 4 tarik Ïaïong, la lap ïa ka metïap jong u shynrang briew, ïa uba la suba ba u la shah pynïap, na ka kshaid Thupthup kaba don ha ka shnong Weinynsier ha Eastern West Khasi Hills.
Nalorkata, ha kawei pat ka jingjia, u Mofizur Hoque u la ujor ba ha ka miet jong ka 19 tarik Lber, ki runar ki la tuh ïa ka thuk-thuk jong u (ML-08F-3493) na Lower Babupara, Tura. Sa ha kawei pat ka jingjia, ki pulit ki la ong ba ha ka 7 tarik Ïaïong ha ka por kumba 11:20 mynmiet, ki la ïoh jingtip lyngba ka ‘Phone’ na uwei u briew uba la kam ïalade ba u dei u dkhot kata ka ‘Anti-Corruption Wing’, bad uta u dkhot u la pyntip ba ka la don ka jingkem ding jong ka jingkieng kaba don hapdeng ka ïew Rajabala bad Namabilla, West Garo Hills. Ha ka por ba ki pulit ki la leit sha katei ka jingkieng, ki la lap ba ka la ing shisha, bad ki la suba ba uba thang ïa ka u dei utei hi u briew uba la ai jingtip sha ki.
