Mawkyrwat, Ïaïong 10
Ka Voice of the People Party (VPP) ha ka Sngi Balang ka la hiar sha South West Khasi Hills ha ïew Mawkyrwat, Mawkhan, Mawkohphet bad kiwei kiwei ki shnong ban pan jingkyrshan na ki paidbah ka dong ka thaiñ ïa u Dr Ricky Syngkon, u kyrtong ka VPP ban ïakhun ïa ka ilekshon MP sha Lok Sabha.
U Bah Ardent M Basaïawmoit, President ka VPP haba ai jingkren ha ka jingïalang ha ïew Mawkyrwat u la ong, kiwei ki seng saiñ pyrthei kumba long mynta ki la tieng ïa ka VPP namar ka jingmih jong ki paidbah ban ai jingkyrshan ïa kane ka seng ha man la ki jingïalang.
“Mynshwa ki kren beiñ katno kin shan kine ki seng thymmai, ki dang mut ba ka VPP ruh kan leit sdien bos lem kumba long kiwei,” la ong u Bah Ardent.
Hynrei haba la ïaid ki snem ki por haba u paidbah u la sdang ban sngewthuh, ki la lap sa ka tieng mynshwa ki kren shongshit, ki peit beit ha ‘Youtube’ shano une u prah u leit ban pynlong jingïalang bad ki da ong ba hana ha ‘social media’ te la jop beit u prah, hynrei mynta pat ynda u paidbah u la mih da ki hajar ban kyrshan ïa ka VPP ki la sdang sa ban tieng bad rung kluk sha ‘social media’ ban kynnoh ban kynthoh.
U Bah Ardent u la ong ruh ba ka jingïaleh ilekshon ha kane ka kynti kaba mynta ka dei tang kumno ban pynrem ïa ka VPP. Kam pher lada ka jop kano-kano la seng la ka long ka RDA ka NPP ne ka Congress tangba rem ka VPP.
Balei ki tieng katne-katne ïa ka VPP, la ong u Bah Ardent. Ka daw ka long ba ka VPP ka la dep ban pynbna ba lada ka ïoh ban synshar kan peh ïa ka bamsap kan peh ïa ka jingduk bad kan peh ïa ka jingleh shilliang khmat.
Shuh shuh u la ong ba ka jingmih jong ka RDA ban pyni ïa u paidbah kum ka dak ka jingïatylli jong ki seng riewlum hapdeng ka UDP bad HSPDP ka dei tang ban pynbieit ïa u paidbah.
Ki paidbah haduh mynta kim pat ïohi ïa ki MLA jong ka HSPDP ba kin ïeng rynsan lang bad ki nongïalam jong ka UDP na ka bynta u kyrtong ka RDA.
Kumta ki paidbah ki donkam ban kylli na kine ki nongïalam ka RDA shano ki jah kine ki arngut ki MLA jong ka HSPDP. Ha kane ka sngi la pynïaid ïa ka jingïalang da u Bah Ailadstar Nongrum ha ryngkat da ka jingdonlang ki nongïalam ka VPP Mawkyrwat.
