Nongpoh, Ïaïong 10
Ki runar ïa kiba ym lah ban ithuh dur khmat ki la leit ban kawang maw ha ka ïingsah ka MDC ka Umsning, ka Kong Macdalyne Sawkmie Mawlong, ha Mawleiñ Mawkhan (Sohkyndur) ha ka Sngi Balang ha ka por kumba 6 baje janmiet eiei.
Katkum ka khubor ba la ïohlum, la ong ba ki runar, kiba la wan da kawei ka kali Alto K10 rong byrthup (grey), hadien ba la poi ha katei ka ïing sah ka MDC Umsning ki la kawang da u maw ha kaba ka ïit jong ka ïing sah ka la pait, hynrei ki briew kiba don hapoh ïing ki khlem mynsaw.
La ong ruh ba ka Kong Macdalyne ka la don lang ha katei ka por ryngkat kiwei pat ki nongkyrshan ka seng NPP.
Halor kane ka jingjia, na ka liang ki bor pulit ka Umïam ki la hiar mardor ban leit tohkit bad hadien ba la poi ki la lap shisha ba ka la don ka jingshah kawang maw bad la lap ruh ïa ar tylli ki maw na katei ka ïing sah jong ka MDC bad ka jingtohkit halor katei ka jingjia ka dang ïaid shakhmat.
