Texas, Iaïong:
Kawei ka longkmie na ka nongbah Texas jong ka United States, ka la shah kem noh hadien ba la shem ia ka jingleh be-aiñ jong ka da kaba paring jubor ia u khynnah rit sha ka kamra leit bar bad pynbor ba un dih ia ka um na ka paiñkhana.
Katkum ka khubor na ka Woodway Public Safety Department, ki pulit ki la bat noh ia katei ka briew kaba la ithuh kum ka Claudia Velediaz-Bonifazi na ka bynta ki jingtohkit ba bniah halor katei ka jingpyni bor jongka pyrshah ia utei u khynnah rit. Na ka liang ki pulit bad bor ka aiñ ki la ioh ban kem noh ia katei ka briew ha ka 3 tarik u Iaiong hadien ba ki la ioh ia ka khubor ba utei u khynnah u leit poi sha skul ha ryngkat ki ummat kthang bad kaba la pynlong ia ki nonghikai bad ki bor pyniaid skul ba kin ngam jylliew bad tih bniah halor kaei kaba la jia ia utei u khynnah ha katei ka sngi.
Ki pulit ki iathuh ba utei u khynnah u la phla lut ha ki nonghikai ba katei ka briew ka la paring bad tan jubor ia u sha ka kamra sum jong ka iing bad ka la pynngam ia ka khlieh jong u hapoh ka paiñkhana ban phah dih ia u ia ka um na ka paiñkhana ha ka iing jong ka.
Nalor kata, hadien ba ki pulit ki la tohkit bniah bha ia utei u khynnah, ki shem ba utei u khynnah u ju shah pynshitom beit bad shah synshar donbor ha katei ka briew la slem bah bad u ju shah shoh-shah tied ruh da ki tiar kiba pynmynsaw ia u la bun sien.
Ki pulit ki la kem noh ia ka Claudia bad ki la phah noh pat ia utei u khynnah sha ka jaka sah ki bahaiing jong u na ka bynta ban ai jingiada bad sumar ia u na ka jingleh torti jong katei ka briew.
Kat ia mynta ki bor pyniaid bad ki pulit ruh kim shym la ai jingpynshai halor ka jingiadei hapdeng utei u khynnah bad katei ka briew.
Hynrei ha u Rymphang ruh, ka la don kawei ka jingjia ha kaba ka kmie jong uwei u khynnah 7 snem kaba la tan jubor ia u na skul ban pynshitom namar ki jingsaitlah jong u kum u khynnah rit. Ha kaba ka la kynhied ia u ban rung hapoh ka kali, katba utei u khynnah u dang bat ia ka kti ha ka jingkhang jong katei ka kali, katei ka kmie ka la pyniaid kynsan ia katei ka kali, ha kaba utei u khynnah u la shah tylliat ha ka shaka ba nadien jong katei ka kali katba u dang pyrshang ban plie ia ka jingkhang bad ban rung hapoh ka kali hadien ba u la shah kynhied ha katei ka kmie jong u ha katei ka por.
Katei ka longkmie ruh ka la shah kem noh ha ka 8 tarik u Rymphang jong une u snem 2024 bad la pynngat ia ka hapoh ki kyndon pynkheiñ aiñ bad jingbuh jingma ia ka jingim kiwei pat namar ka jingleh donbor jongka.
