Shillong, Ïaïong 10
Ka Langsning FC ka la bteng biang ïa ka jingjop kaba ar ha ka lympung ïalehkai Shillong Premier League 2023-24 ba la pynïaid da ka Shillong Sports Association, hadien ba ka la lah ban pynliem noh ïa ka Sawmer SC da 1-0 kol ha ka Sngi Ba-ar.
Kane ka nam jop ka la wan urlong lyngba u Damanbhalang Chyne na ka bynta ban pynlong ïa kane ka kynhun ban khur ïa ki lai point.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Wat la kine ki kynhun ki la ïoh ïa ki kabu ksiar kiba biang, hynrei kim shym la lah ban thep kol haduh kaba kut jong ka kylla step.
Hadien ba la bteng ïa kane ka jingïakhun jong ka kylla miet, kine ki kynhun ki la pyrshang biang ban ïakhun tyngeh, hynrei kim shym la lah ban pynurlong. Ka Langsning kaba la lah ban pynliem ïa ka Nangkiew Irat da 4-1 kol ha ka jingïalehkai ba la lah, ka la ïoh ban pynkhihjar shwa ban kut ka jingïalehkai lyngba u Damanbhalang ha ka minit kaba 86. Haduh kaba kut ka Sawmer kam shym ka la lah ban pynphai bad ka la mad ïa ka jingshah rem.
Lyngba kane ka nam jop ka Langsning ka la jam sha ka kyrdan basaw bad kamai 6 point na ki lai sien ïakhun, katba ka Sawmer ka dangïai sah ha ka kyrdan ba shatrai namar kam pat shym ïoh jingjop na ki saw sien ïakhun.
Kane ka lympung kan bteng biang ha ka Sngi Balang ha kaba ka Ryntih SC kan ïakhun pyrshah ïa ka Nongkiew Irat SC ha ka por 3 baje janmiet.
