Shillong, Ïaïong, 10
Uwei u nongbylla bar jylla u la duh ei noh ïa la ka jingim bad uwei pat u la mynsaw na ka jingshah thombor ha ka kynhun ki runar ki bym lah ban ithuh durkhmat satia kaba la jia ha ka step jong ka Sngi Balang.
Katkum ka khubor kaba la ïoh lum la ong ba ka kynhun ba 6 ngut ki briew ki bym shym la ithuh durkhmat, kyndit-kynsan ki la wan ban thombor ïa ki nongbylla kiba dang pyntrei ïing ha Mawlai Mawroh ha ka dong Umsohkhlur Block -3.
La ong uwei napdeng ki 3 ngut ki nongbylla u la ïoh ban phet krad noh na kane ka jaka shwa ba kine ki runar kiba la kah durkhmat kin thombor, katba ar ngut kiwei pat ki la shah tied shah bom, ha kaba la pyndonkam da ki tiar shna ïing kiba don ha kane ka jaka ban tied naphang.
La ong ba hadien ba la dep ban tied bad bom jem haduh ba kin da thiah lyngktar ha madan, ki runar ki la phet noh na kane ka jaka. Kumta na ka liang kiba sah marjan kiba la ïohi ïa kine ki briew kiba thiah lyngktar ki la pyntip noh sha ka 108 kaba la wan poi mar-mar bad pynkit noh sha NEIGRIHMS Hospital, Shillong. Namar ka jingmynsaw jur, uwei u nongbylla uba la tip kyrteng kum u Arjun Rai ba la 52 snem ka rta, u la khlad noh.
U Superintendent of Police (SP) ka East Khasi Hills ha ka kyrwoh ba la phah sha ki lad pathai khubor, u la pyntip ba ki pulit ki la pynrung mukotduma halor kane ka jingjia bad ka jingtohkit ka dang ïaid shakhmat ban ithuh ïa ki runar kiba donkti ha kane ka kam.
Haba ïakren bad u Rangbah Shnong ka Mawroh, Bah HBR Lyngdoh, u la ïathuh ba kane ka jingjia ka la jia ha ka por kumba 10.30 eiei katba kine ki nongtrei ki dang trei la ki kam ki jam, ha kaba kynsan-kynsan la wan kumba 6 ngut ki briew ba la tap durkhmat ban shoh ban tied ïa ki kat haduh ba uwei u la khlad, uwei u la mynsaw bad uwei u la phet krad na katei ka jaka. U Rangbah Shnong u la ong ba kine ki briew kiba bylla kim dei na ka shnong Mawroh hynrei ki dei tang ki nongwan bylla hapoh ka shnong.
Nangta, u la ong ba kiba sah marjan hadien ba ki la ïohsngew ïa kane ka jingjia bad ki la ïohi ïa ka jingthiah lyngktar ha madan ryngkat ka snam mar-mar ki la pyntip sha ka 108 ban pan jingïarap.
Shuh shuh u Rangbah Shnong ka Mawroh u la ong, kane ka long kaei-kaei kaba pynsngewsih bad na ka liang ka shnong ka pynrem jur ïa kum kane ka jingjia wan leh riewkhlaw ki ‘riew shim kabu hapoh shnong poh thaw.
Haba kyntu ïa kino-kino ki briew kiba pyrshah ïa ka jingwanrah nongbylla bar jylla hapoh u pud u sam jong ka shnong, u Rangbah Shnong u la ong, “Wan shakhmat, kylli kaei kaba phi donkam bad lada phi kwah kylli jingkylli ïano-ïano ruh wan da ka lynti kaba dei hynrei ban shu wan bad ban shu leh kumne ka buh jingsyier ïa ka jaidbynriew jong ngi kiba don shabar ka jylla jong ngi.”
