Nongpoh, Ïaïong:
Ka Synjuk ki Seng Samla Shnong (SSSS) Byrnihat Area ka la kyntu ïa ka Khasi Hills Autonomous District Council (KHADC) ba kam dei ban pdiang ïa ka jingdawa jong ki Garo ban ïoh bat kam Rangbah Shnong ha ki shnong khappud khamtam ha Raid Marwet.
Kane ka jingkyntu na ka liang ka SSSS hapoh ka jingïalam u samla Kitbor Suting kum u Chairman ka la long ha ka Sngi Ba-ar, hadien ba ki nongïalam ki la leit ban ïakynduh ïa u Chief Executive Member (CEM) ka KHADC u Bah Pynïaid Sing Syiem. Ka SSSS ka la kyntu ruh ïa u Syiem ka Hima Mylliem bad aiti ïa ka dorkhas ba pynpaw ka jingpyrshah ïa ka jingdawa ki Garo.
Ïa ka SSSS Byrnihat Area la synran ruh da u Chairman ka Synjuk ki Rangbah Shnong ka Ri-Bhoi District, Bah BB Makdoh bad ruh ki nongïalam ka Synjuk ki Seng Samla Shnong Shillong City.
Lah ban pynkynmaw ba ki paid Garo lyngba ka All Ri-Bhoi Garo Headmen Association bad ka All Khasi Hills Achik Federation (AKHAF) ki la dawa ban ailad ïa ki Garo ba kin bat kam Rangbah Shnong ha ki shnong ba shong ba sah ki Garo bad ha kaba ki la dep ruh ban ïakynduh ïa u Myntri Rangbah ka Jylla u Conrad K Sangma ba un tuklar halor kane ka kam.
U Chairman ka SSSS, samla Kitbor Suting haba kren sha ki lad pathai khubor hadien ka jingïakynduh ïa u CEM bad Syiem Mylliem, u la ong ba kane ka jingdawa jong ki Garo ka dei ka bym don nongrim satia bad kaba ïaid pyrshah ïa ka Mylliem Act, 2007 bad kumjuh ruh ïa ka United Khasi Jaiñtia Autonomous District Council (Appointment and succession of Chiefs and Headmen) Act, 1959.
U la ong, katkum ka Mylliem Act, ki Garo ki dei tang ki raïot bad kim dei satia ki khun ki hajar ka Hima kiba lah ban bat ïa ka kam Rangbah Shnong.
Nalor kane, ka SSSS-Byrnihat Area ka la mudui ruh ha u CEM bad Syiem Mylliem halor ka jingdon ki Rangbah Shnong Garo kiba dang pyndonkam ïa ka muhor bad ka Letter Head Rangbah Shnong wat hadien ba la pynmih hukum da ka shlem treikam ka Dorbar Hima Mylliem lyngba ka shithi No.MS/V-15/2023/804-13 dated 16/05/2023.
