Shillong, Ïaïong 10
U CEM ka KHADC, Bah Pynïaid Sing Syiem u la kyntu ïa ki nongïalam ka Voice of the People Party (VPP) ba kim dei ban wanrah ïa ka saiñ pyrthei na West Bengal sha ka jylla Meghalaya namar ha ki jingïalang ka NPP ki thmu ban pynkulmar.
U Bah Pynïaid u la pynpaw ïa kane ha ka jingïalang ïalap ilekshon ha ïew Diengpasoh kaba hap ha Mawryngkneng konstitwensi, East Khasi Hills District kaba la long ha ka Sngi Balang ban pan jingkyrshan na ki paidbah.
Haba ai jingkren ha kane ka sngi, u Bah Pynïaid u la ai khublei ïa ka Election Commission ka Ri India ba ka la thoh shithi ban pan jingshai na u nongïalam ka VPP halor ka jingpynkulmar ha ki jingïalang ka NPP.
U Bah Pynïaid u la kyntu ïa ki nongïalam ka VPP ba ki dei ban kylla ka jingmut jingpyrkhat khnang ban wanrah ïa ka shongsuk-shongsaiñ namar ha ka por ba u don ha Umsning u la hap ban bthah ïa ki pulit ba kin leh eiei ïa kito kiba wan pynkulmar ha ka jingïalang ka NPP khnang ban nym mih kano-kano ka jingkulmar.
Namar kata, u la kyntu ïa ki nongkyrshan ka NPP bad ïa kiwei ki seng saiñ pyrthei ba kim dei ban leit pynthut ha ka jingïalang jong kiwei ki seng khnang ban nym pynthut.
Halor ka jingwan ai jingkren u nongaiktien ka VPP, Bah Batskhem Myrboh ha ka jingïalang ha Diengpasoh mynshem taïew, u Bah Pynïaid u la ong ïa ki paidbah ba kim dei ban sngap ïa ki ktien jong une u nongïalam ka VPP namar ki paidbah ki la tip ïa ka jingtreikam jong u kum u MDC bad kum u MLA shi snem. Ha kajuh ka por, u Bah Pynïaid u la ong ba ki nongïalam ka VPP ki heh tang ka kyrdan, katba ïa ka jabieng jong ki la pynïaid na West Bengal.
