Agartala, ïaïong:
Ki la don kumba 12,000 ngut ki shipai jong ka sorkar kmie bad ka sorkar jylla ki ban sa shah pyntreikam ha Tripura na ka bynta ka ilekshon Lok Sabha ban wan.
Ka jingthep vote kan sa long ha ki ar tylli ki bynta, ha kaba ka ilekshon ha Tripura West Lok Sabha konstitwensi bad ka Ramnagar Assembly konstitwensi ka la dei ban long ha ka 19 tarik, Ïaïong ha kaba yn sa bud sa ka ilekshon ha Tripura East Lok Sabha konstitwensi ha ka 26 tarik, Ïaïong. Kumba ka long mynta, la ong ba ki la don kumba 84 tylli ki kynhun jong ki shipai Central Armed Police Forces (CAPFs) kiba la shah pyntreikam ha Tripura, kynthup ki 14 tylli ki kynhun jong ki CRPF kiba dang poi shen.
U Assistant Inspector General jong ki pulit ka Tripura u Jyotishman Das Chaudhury u la pyntikna da kaba ong ba yn ym don shuh ki shipai ban dang phah na kaba la dep ban mang. Kawei kawei ka kynhun jong ki shipai CAPF ka kynthup ïa kumba 80 haduh 100 ngut ki shipai.
Shuh shuh, la ong ba kin sa don kumba 4500 ngut ki shipai ka kynhun Tripura State Rifles ki ban sa ai jingïarap ha ki jaka ba don ki jingpyntreikam ha kaba ïadei bad ka ilekshon, katba ki shipai BSF kin sa pynkhlaiñ ïa ka jingpahara ha ki bynta ka khappud India-Bangladesh.
