Shillong, Ïaïong 11
Ka jingthep ‘vote’ na la ïing na bynta kiba la noh ka rta kata, kiba la palat 85 snem ka rta bad kiba don jingduna ha ki dkhot met kan kut ha 13 tarik mynta u bnai.
Ki nongpynïaid ïa ka jingthep ‘vote’ ki la leit sha kylleng ki ïing sah jong ki nongthep ‘vote’ kiba don ha kylleng ki shnong bad ki konstitwensi ban pyndep ïa ka jingthep ‘vote’ kumba ki la jied lyngba ka form 12D.
Na ki 21,000 ngut, palat 6,106 ngut ki nongthep ‘vote’ ki jied ban thep ‘vote’ na la ïing kaba la sdang naduh ka 8 tarik mynta u bnai na ka bynta kiba la kynjoh 85 snem ka rta shaneng bad kiba duna dkhot met ha baroh ar tylli ki konstitwensi, Shillong bad Tura Lok Sabha konstitwensi.
Ha Shillong Lok Sabha konstitwensi ki don 8,173 ngut kiba la kynjoh 85 snem shaneng bad 8,515 ngut kiba duna dkhot met. Ha Tura Lok Sabha konstitwensi, ki don 2,007 ngut kiba la kynjoh 85 snem shaneng bad 2,682 ngut kiba duna dkhot met.
Kiba la dep pyndap kyrteng katkum ka form 12D ban thep ‘vote’ na la ïing ki don 3,424 ngut na Shillong Parliamentary constituency bad 2,682 ngut na Tura Parliamentary constituency. Ka jingthep ‘vote’ na la ïing ka dei kaba la buh ban pynlong ha la ki jong ki sngi ha kylleng ki district.
