Shillong, Ïaïong 11
Kum shibynta ban ai jingïarap ïa kiba duna ha ka ïoh ka kot, ka West Jaiñtia Hills District Adventures Sports and Mountaineering Club (WJHDAS & MC) ha ryngkat ka jingïatreilang bad ka Mission Nethralaya Eyecare Centre Shillong ka la pynlong ïa ka jingsumar khmat ei ha Jaïaw Pdeng. Ïa katei ka klob la seng da u Bah Sambor Surong ha ka 27 tarik u Kyllalyngkot, 2020.
Na ka liang u Bah Surong uba dei u nongseng jong ka WJHDAS & MC bad uba shong ba sah ha Jaïaw Pdeng, u la ong ba kum u nongshong shnong u don ïa ka lyngkor kumno ban leh eiei na ka bynta ka shnong. Nangta u la ong ba ïa kane ka jingai sumar khmat ei na ka liang ka klob ka kwah ban leh ym tang hapoh ka Jaiñtia Hills distrik hynrei wat sha kiwei-kiwei ki distrik ruh kumjuh.
U Bah Surong u la ong ba ka jingleh jong ka klob ïa katei ka jingsumar khmat ei ka la ïarap shikatdei eh ïa ki paidbah khamtam eh la ïohi ba kiba bun kiba la wan sha katei ka jingsumar ki dei ki briew kiba wan na ki longïing-longsem kiba duna ha ka ïoh ka kot namar ba kim ïoh lad ban leit phah sumar sha ki jaka ai jingsumar kiba rem.
U la ong ruh ba ka jingai sumar khmat ïa kiba don ïa ka Ration Card kaba rong stem bad kiba hap ban deng ïa ki ïit-khmat ki lah ban ïoh ei bad kito ki bym don ïa ka Ration Card pat, ki la ai 30% ïa ka ïit-khmat bad 20% ïa ki dawai bad ki la don ruh ki longïing ki bym shym la lah ban thied ïa ki dawai. Kumta na ka liang utei u nongseng jong ka klob u la ïaleh katba lah ban ïarap ïa kitei ki briew da ka song pisa jong ka klob kat kaba ki don ha ryngkat ka jingnoh synñiang ruh jong katto-katne ki riewshimet kiba ym kwah ban pynpaw kyrteng ïalade kiba la noh synñiang da ka jingthmu ba ki kwah ba utei u rangbah un nang ïai pyntyllun ïa katei ka kam babha ha kylleng-kylleng ki jaka.
“Nga ngeit skhem ba kane ka jingleh ka jong ngi kan long kaba ïaid beit ïaid ryntih ba kan nym don kano-kano ka jingpynthut”, la ong u Bah Surong. Shuh shuh u Bah Surong u la ïathuh ba kane ka jingai sumar khmat ka dei ka sienjam ba la shim da ka klob ha ka sien kaba lai namar ha ka sien kaba nyngkong ka klob ka la leh ïa kane ka jingsumar khmat ei ha Khimmusiang kaba don ha Jowai. Kaba ar ka dei kaba la leh ha Kiang Nangbah College ha ka jingïatreilang bad ka Kiang Nangbah Student’s Union.
“Nangne shakhmat, ngin sa dang leh shuh-shuh ruh sha kiwei-kiwei ki dong bad ki shnong ki thaw, nangne shakhmat ngin ïaleh ban pan jingïarap na ka liang jong ka sorkar hynrei namar mynta ka dang ïaid ka Model Code of Conduct, ngam lah ban leit pan jingnoh synñiang nangno-nangno hynrei nga hap ban ïaid katkum ka jingpynïaid jong ka sorkar”, la ong u Bah Surong.
U la ïathuh ruh ba ha katei ka jingleh jong ka klob ban ai sumar khmat ei ïa ki paidbah ka la mih ruh pat ka jingshah kynthoh kaba la ong ba ka jingleh jong ka klob kumne ka dei namar ka jingkwah kiew jong ka klob. Na ka liang u Bah Surong u la ong ba katei ka jingkynthoh ka long kaba ym dei bad na ka liang ka klob ka ju don ïa ki mat treikam jong ka klob kata ban ai jingïarap bad pynsngewthuh paidbah ha kaba ïadei bad ki khmat.
Na ka liang ka klob ka la ong ruh ba nangne shakhmat kan sa pynlong ruh ïa ka jingai snam ei hadien ka jingshong ïa ka jingïalang hapdeng ki dkhot jong ka klob.
U Bah Surong u la ïathuh ruh na ïa katei ka klob la thaw nyngkong eh da ka jingthmu ban rat dyngkhong ïa u drok napoh ka jylla uba la sdang jyllei bha. Kumta u la kyrpad ïa ki khynnah samla bad ki nongshong shnong ba ki lah ban khot ïa katei ka klob ha kano-kano ka por ban ïadonbynta lang bad ka shnong khnang ba kan plie lad ïa ki khynnah shnong ba kin ïoh ban ïashimbynta ha kum kine ki jait shlur.
“Ha ka jingpeit jong nga, nga ïohi kiba bun ki briew ki la ngop ha ka jingdih drok bad ki la sdang sa ka tuh ka thiem bad khnang ba kin lait na kata, na ka liang jong nga kum u nongseng jong ka klob, nga kloi ban treikam lang bad ka shnong bad ki tnad bapher-bapher ba ngin lah ban kyntiew ïa ki khynnah”, la ong u Bah Surong.
Shuh shuh u Bah Surong u la ong ba ka jingmyntoi ba ka klob ka ai jinghikai ka dei khamtam ïa ki ‘Local Guide’ ne kita ki briew kiba napoh ka jylla kiba ju ïalam kai kylleng ïa ki briew kiba wan nabar ka jylla ne nabar ka ri namar ba ha ka jingpeit jong u, u la ïohi ïa kane ka kam la jyllei da u bar jylla u ban ïalam kai ïa ki nongwan jngoh pyrthei kiba nabar.
