Shillong, Ïaïong 11
Ki dang don sa katto-katne tylli ki shnong kiba ki nongpynïaid ïa ka ilekshon ki dang hap ban shong da ka lieng haba leit ban pynlong ïa ka jingthep ‘vote’ ha ka 19 tarik mynta u bnai.
U Chief Electoral Officer, Dr B.D.R Tiwari u la ong ba ka shlem treikam jong u ka dang lum jingtip ïa ki jaka namar ki dang don sa katto-katne kiba ym pat poi surok kali bad ki paidbah ki hap ban ïaid kjat bad hap kam na shiliang sha shiliang jong ka wah da kaba shong da ka lieng.
Ha ka ilekshon MLA ha u snem 2023, ki jaka thep ‘vote’ kum ka shnong Nongriat ha East Khasi Hills district bad Kamsing ha thaiñ Amlarem ki dei ki shnong kiba ki nongpynïaid ïa ka ilekshon ki dang hap ïaid kjat ban poi sha shnong bad hap ruh ban kam ïa ka wah da kaba shong da ka lieng.
La ong ba ki don katto-katne ki jaka thep ‘vote’ ha Rilum Garo kiba dang hap ïaid kjat bad shong da ka lieng.
Ka don ruh kawei ka shnong ka Mawryngkhong kaba hap ha thaiñ Shella Bholaganj, East Khasi Hills district, ha khappud bad ka Bangladesh ha kaba la ïohi ba ka kyrtong ka NPP ka Kong Ampareen Lyngdoh ka la shong lieng bad kiwei pat ki longkmie ban leit sha Mawryngkhong.
