Jowai, Ïaïong 11
Ka Ummulong Cricket Club ka la pynliem noh ïa ka Moodymmai Cricket Club da 44 run ha ka lympung ïalehkai ‘District Cricket League 2024’ ba la pynïaid da ka West Jaiñtia Hills District Cricket Association ha ka Sngi Palei ha Khliehtyrshi Mini Stadium.
Ïa ka jingkynting pisa la jop da ka Ummulong ha kaba ka la jied ban tied nyngkong bad kamai 214 run na ka 35 over bad shah pynhap 4 wiket. U Rejoice Gassah u la tied 65 run na ki 71 bol bad u Heimonlang Lyngdoh u la ïoh tied 44 run na ki 18 bol bad u Chongtre Iman Lamare 37 run na ki 40 bol. Katba na liang nongkawang bol ka Moodymmai, u Daowan Passah u la khur 2 wiket.
Haba beh ïa ka thong ka Moodymmai ka la kamai tang 170 run ha ka 29.4 over bad shah pynhap wiket baroh ki nongtied. U Bamanbha Shangpliang u la lah ban tied 68 run na ki 58 bol, u Richel Passah u la ïoh 23 run na ki 28 bol, Rijest Lytan 23 run na ki 30 bol. Katba na liang nongkawang ka Ummulong, u Heimonlang Lyngdoh u la khur 3 wiket na ka 6.4 over, u Sumarlang Lamare bad u Sylvester Mylliempdah ki la ïoh mar 2 wiket na ka 5 over bad 7 over. Ïa ka nam ‘Man of the Match’ la khur da u Heimonlang Lyngdoh jong ka Ummulong Cricket Club.
