Shillong, Ïaïong 11
Ka Seiñ Raij Wahïajer kaba hap ha Nartiang konstitwensi, West Jaiñtia Hills kan sa ïoh ban pdiang da ka jingkylluid mynsiem ïa ka Lympung Seng Khihlang kaba dei ka jingïakynduh kaba shisien shisnem jong ka Seng Khasi bad Seiñ Raij naduh ka 19 tarik haduh 21 tarik u Ïaïong 2024 hadien saw snem ba la shah pynthut nha ka jingwan ka khlam COVID-19.
Kum ban shu pynkynmaw, ka Seiñ Raij Wahïajer kaba la dep shna ïa ka ‘pandal’ ka la dei ban pdiang ïa ka Lympung Seng Khihlang ha u snem 2020 hynrei namar ka jingkhangdam ha ka ri India baroh kawei namar ka khlam COVID-19 la hap ban pynsangeh noh bad ïa kane ka lympung la pdiang noh mynta u snem.
Ka jingduhnong kaba khraw ïa ka Seiñ Raij Wahïajer ka dei namar ïa ka ‘pandal’ kaba la shna ha ka jinglut kaba T. 17 lak ban shong ki nongïalam kumjuh ka jaka shad bad jaka rwai tynrai la hap ban pynpra noh ha kito ki por, bad mynta la hap ban pynlut biang sa shisien ban shna ïa ka ‘pandal’.
Ban tip kham bniah shuh shuh ha ka jingïaid lynti ban pynkhreh ïa kane ka lympung la ïoh ban ïakren bad u President ka Seiñ Raij Wahïajer, Bah Chut Pale uba la ïathuh ba ha ka 19 tarik mynta u bnai kaba dei ka sngi ban wanrah ïa u Mawbynna na Seng Khasi Shait Shait kaba hap ha South West Khasi Hills District, la hap ban pynkynriah noh sha ka 20 tarik mynta hi u bnai namar ba ka ïatyngkhuh bad ka sngi thep ‘vote’ ïa ka ilekshon MP Lok Sabha.
U la ïathuh ba ki bor district ki la ai jingbit tang kawei ka kali ban kit ïa u mawbynna bad kawei ka kali ban bud nadien ban ïaid ha ka 19 tarik Ïaïong hynrei kim da sngewtynnad ban leh kumta namar kan kynjah haba ïaid lynti. Kumta ban shngaiñ haba pynkhreh kat ïa ka lympung, ki la rai ban wanrah noh ïa u mawbynna ha ka step jong ka 20 tarik Ïaïong tangba kin ym ïeng shuh ha man ki tnat Seng Khasi, hynrei kin ïaid beit namar hap ban pynïeng ha ka por 10:30 mynstep.
Nalor nangta, u la ïathuh ba ka jingpynlong ïa ka Seng Khihlang ha Tyrsad ha u snem 2023 namar ka Seiñ Raij Wahïajer ka dang artatien ïoh wan biang ka jingpynthut haba la dep pynkhreh shisien bad mynta u snem ki la pdiang da ka jingkylluid mynsiem namar ki don jingkyrmen ban ym don jingpynthut shuh.
Shuh shuh u la ïathuh ba ka jingdon briew ha ka Seiñ Raij Wahïajer ki kot palat lai hajar ngut bad ki ïing ki don palat 400 ïing.
“Kaba ngi duhnong palat ka dei ka ‘pandal’ kaba ngi la shna ha u snem 2020 ha ka jinglut kaba ` 17 lak tyngka bad mynta ngin shna biang ha kajuh ka jinglut” u la ong.
Ha kawei pat ka liang u la pyntip ba ki kali kiba wan na Shillong bad Jowai la dep pynkhreh ki jaka pynïeng kali kiba heh ha ka shnong Wahïajer bad ka jaka pynlong ïa ka lympung ruh kan rung palat ar lak ngut.
