Boko, Ïaïong 11
Hynriew tylli ki shnong kiba hap hapoh ka Boko konstitwensi ha Assam, bad kiba dei ki shnong kiba ka jingïakajia pud hapdeng ka Meghalaya bad Assam, ki la rai ban ym ïashim bynta ha ka ilekshon MP Lok Sabha namar ki kwah ban don bad ka Meghalaya.
Ha ka jingïalang kaba la long ha ka Sngi Balang, ki nongshong shnong na Damrang, Garopara, Rongchikona, Watre, Phalukmari bad Dokolgre, ki la ïakynduh hapoh ka Damrang Borjuli ME School ban shim ïa ka rai ba kin ym thep ‘vote’ ha Assam ha ka ilekshon MP.
“Ha u snem 2021, kiba bun na ki lad pathai khubor ki la pynbna ban pynbeit ïa ka jingïakajia pud hapdeng ka Assam bad Meghalaya, yn shim ïa ka jingpynsngew na ki 8-9 tylli ki shnong kiba hap hapoh ka jingïakajia pud. Baroh ki shnong ki jong ngi kiba shong ba sah da ki jaitbynriew Garo ngi la kwah ban leit sha Meghalaya, hynrei wat hadien ki jingkyrpad kiba bun, kane kam pat urlong,” la ong uwei na ki nongshong shnong ha katei ka jingïalang.
“Ha ka 22 tarik Naiwieng, 2021, ngi la shah khot ha ki nongïalam bad nongmihkhmat na baroh artylli ki jylla (ba kynthup ïa ki MLA bad Myntri sorkar) ha kaba la ong ïa ngi ba ki shnong kin lah ban jied la ki kwah ban neh ha Assam ne ban leit noh sha Meghalaya. Da kane ka jingkular kaba ngi la ïoh, 13 tylli ki shnong ki la ïakynduh bad rai ban don bad ka Meghalaya. Hynrei na kine ki 13 tylli, 6 tylli ki la shah iehnoh shadien,” la ong u Somith Sangma uba dei uwei na ki nongïalam shnong.
Namar ka jingbym shah kynthup hapoh Meghalaya, kitei ki shnong ki la leit mareh sharum-shaneng ryngkat ki jingkyrpad ban don ha kane ka jylla. Nalorkata, ki la ong ba ki la ïakynduh ïa u Myntri Rangbah, u Conrad K Sangma, la bunsien halor katei ka mat, bad wat la u la kular, hynrei ki la ong ba haduh mynta ka mat ka dang sah kumjuh.
Shuh shuh ki nongshong shnong ki la ïakynduh ïa u Myntri Rangbah ka Assam, u Himanta Biswa Sarma bad u Myntri sorkar, u Atul Bora, ha ka por ba ki la wan sha katei ka thaiñ. Hynrei ki nongshong shnong ki la pynpaw ïa ka jingsngewdiaw halor ka jubab ba ki la ïoh na ka sorkar Assam.
“Kum ki nongshong shnong kiba dei na kajuh ka jaitbynriew, ngi kwah ban don bad ka Meghalaya, bad ngi kyrpad ïa ki arngut ki Myntri Rangbah ban shah ïa ngi ban don bad ka Meghalaya. Ngi shimkhia bha halor kane ka jingdawa jong ngi, bad ban pynpaw ïa kata ka jingsngewkhia, ngi la rai ban ym leit thep ‘vote’ ha Assam ha kane ka ilekshon MP ka ban long ha u bnai Jymmang,” la ong u Biswa Sangma uba dei sa uwei pat u nongshong shnong.
Ki nongshong shnong ki la pynpaw ba ka donkam ïa ki nongïalam jong baroh artylli ki jylla ba kin ïakynduh biang bad ban peit bniah ïa ka jingdawa jong ki paidbah kiba kwah ban don sha Meghalaya.
