Shillong, Ïaïong 11
U Bah Peter Challam uba dei uwei na ki kyrtong shimet ban ïakhun ïa ka ilekshon MP shapoh ka ïingdorbar Lok Sabha na 1-Shillong Parliamentary Constituency na ka shap jong u Mawlynnai, u la ong ba ka jingpynkhreh jong u ïa ka ilekshon ka dei beit kaba la ïaid lyngba ki lad pathai khubor kat kaba u lah ban khot namar ba un hiar hi dalade ban pynlong da ki jingïalap ilekshon paidbah ha kum kine ki por kam long kaba sted kumba sted ha ki ‘social media’.
Haba ïoh ban ïakren bad u Bah Challam, u la ong ba katkum ka jingsngewthuh jong u ka jingpynlong ïa ki jingïalang ïalap ilekshon ka ktah ïa ka lut ka sep bad ïa ka bor khamtam lei-lei ba u don ha ka jaka kaba kham tlot ha ka liang ka jingmih.
U la ong ba wat la katta u la ïaleh hi ban wad ki lad ban pashat ïa la ka jong ka nusib da kaba mih sha madan ban ïakhun ïa kane ka ilekshon MP ba ïoh lehse ki paidbah ka jylla ki kwah da u kyrtong bathymmai.
Nalor nangta, u la ong ba ki paidbah ka jylla ki la ailad ïa kiba bun ki seng saiñ pyrthei kiba heh bad kumjuh ruh ïa ki seng riewlum ba kin synshar ïa ka jylla hynrei kine baroh ki la long kumjuh bad ka jylla ka khlem poi shano-shano ruh hapoh ka jingsynshar jong kine ki seng. Kumta kim don hok shuh ba kin ïa kawang ktieh ne kdew kti iwei-ïa-iwei namar ki paidbah ka jylla ki la dep ban ailad ïa kitei ki seng ba kin synshar ïa ka jylla.
“U paidbah u la ïohi bad mad ha ki ilekshon baroh shikatta ha ki snem kiba la dep ïa ki seng saiñ pyrthei, ngim lah shuh ban kawang ktieh iwei-ïa-iwei. Ka Congress ka la ïoh synshar, ka HSPDP kaba duna shuki ruh ka la ïoh synshar hi, ka UDP ruh kajuh bad mynta lei ka NPP ka la ïoh ban bat ar samoi treikam, u paidbah u la ïohi bad ailad ruh ïa kine ki seng saiñ pyrthei ba kin synshar ïa ka jylla la bun tylli ki snem hynrei kam poi shano-shano”, la ong u Bah Challam.
Ha kawei ka liang u la ong wat la ka jylla Meghalaya ka dei ka jylla kaba riewspah ha ka jingdon-jingem, hynrei kiba bun na ki nongshong shnong ki dei kiba duk bad lehse ha ki por ban sa wan, ka jylla yn sa tip ïa ka kum kata ka jylla kaba duk tam bad kaba la synshar pat tang da ki hehspah suda.
Haba kylli kum kiei ki mat treikam kiba u la buh hakhmat kum u kyrtong ban ïakhun ïa ka MP ilekshon, u Bah Challam u la ong ba kumba ka Shillong Parliamentary Constituency kaba kynthup ïa 36 tylli ki konstitwensi, 7 tylli ki distrik bad 40 tylli tam ki block; kumta kaba donkam eh ka dei ban ïoh ïa u nongmihkhmat uba khlaiñ bha bad u ban rah ïa ka sur khamtam jong ki paid riewlum hapoh Parliament.
“Ki dei ban ïoh ïa ki nongmihkhmat kiba khlaiñ bad ym lah ban pat khmih lynti shibun namar ngi don ki nongmihkhmat tang 2 ngut napoh ka jylla bad kine ki nongmihkhmat ki don ïa ka bor kaba tlot hangthie ban ïasaid na ka bynta ka jylla lajong namar ha ki 545 ngut ki MP, la kumno-kumno ngi dei ban don lang bad kita kiba sngewthuh ïa ka jingeh jong ka jaitbynriew jong ngi khnang ba ïa ka sur jong ngi yn lah ban ïohsngew hangthie”, la ong u Bah Challam.
Shuh shuh u Bah Challam u la ong ba kum ka jylla ka dang dei ban ïai ban jur ïa ka sorkar pdeng ba kan ai noh da ka Inner Line Permit (ILP) namar ka ILP ka don ïa ki bniat kiba khlaiñ bha. Nangta u la ong ruh ba ka jingpynrung ïa ka ktien Khasi ha ka khyrnit kaba phra jong ka riti synshar ka Ri ka long kaba donkam namar ïa ka jaitbynriew la ithuh ba ka long kaba khlaiñ lyngba ka jingithuh ïa ka ktien.
