Cairo, Iaïong:
Katkum ki khubor la iathuh ba 3 ngut ki khun shynrang bad 2 ngut ki ksiew jong u nongialam ba ha khlieh duh ka lehnoh Hamas- u Ismail Naniyeh, ki la duh noh ia ka jingim na ka jingther bom jong ka Israel sha Gaza ha ka Sngi Balang.
Kitei 3 ngut ki khun jong utei u nongialam ka Hamas ki kynthup ia u Hazem, Amir bad u Mohammad bad baroh 3 ngut ki la duh noh ia ka jingim ha ka jingbthei ki bom bad ki ‘namding ba la siat da ki shipai ka Israel sha ka kali ba ki shong ha katei ka sngi.
U Haniyeh haba ai jingkren sha ki lad pathai khubor ha katei ka sngi, u la ong ba ka Hamas kan ym pyndem wat la ka Israel ka pyni bor katno-katno ruh hynrei u la ong ruh ba ka jingthmu jong ka Israel ban thombor ia ka iing- ka sem jong u ka long kaba bakla namar ha kane ka por ka Hamas bad ki heh ka Israel ki dang pynbeit ban iakren ïasuk bad ban wanrah ia ka bha-ka miat ha kine ki sngi ki ban wan.
La ong ba u Haniyeh u la long u nongmihkhmat uba ju kren bad pynsngew ia ka khubor na katei ka kynhun lehnoh Hamas naduh ba ka iingsah jong u ka la shah pynjulor na ka jingther bom ki shipai Israel ha u Naiwieng jong u snem ba la leit.
Ka Hamas ka la pyntip ruh ba ha kane ka Sngi Ba-ar, ki heh ka Hamas ki dang peit thuh ia kitei ki jingtyrwa sangeh thma bad jingiakren ïasuk bad ka Israel. Hynrei u la ong ba ki jingiakut jong ka Hamas bad ka Israel pat kim shym don ha katei ka jingiakut jong ka Israel ha kane ka por.
Namar la hynñiew bnai mynta ka thma jong ka Israel hapoh Gaza ka la neh bad kumta ka Hamas ka kwah ban pynkut noh ia katei ka jingleit hiar thma ba khlem sangeh jong ka Israel sha Gaza da kaba dawa ruh ba ka Israel ka dei ban sngap ia ki jingtyrwa jong ka Hamas, ha kaba baroh arliang ki dei ban ia pyllait ia ki briew ba ki la kem bad set baroh shi katta.
U Haniyeh u la shah thung kum u nongialam ba ha khlieh jong katei ka kynhun lehnoh Hamas ha u snem 2017, ha kaba u Haniyeh u la leit ruh sha Turkey bad sha ka nongbah Doha jong ka Qatar hadien kitei ki snem.
Hynrei, la ong ba ka Israel ka la ñiew ia u Haniyeh bad kiwei de ki nongialam jong ka kynhun lehnoh Hamas kum ki lehnoh ba shyrkhei jong ka Palestine.
Wat la katta, la ong ba ka jingleit thombor ba kynsan-kynsan jong ka Hamas ia ka Israel ha ka 7 tarik u Risaw, ka la pynkyndit ia kitei ki heh kiba don shabar jong ka Palestine namar kim shym bna ne ioh jingtip lypa shaphang ka jingthmu jong katei ka kynhun lehnoh Hamas ban leit thombor ia ka Israel.
