Kyiv, Iaïong:
Ki bor pyniaid ka Israel ha ka Sngi Balang ki la iathuh ba 3 ngut ki ‘riew paidbah ki la duh ei ia ka jingim na ka jingther ‘namding jong ki shipai ka Russia sha ka nongbah Kharkiv jong ka Ukraine ha katei ka sngi.
Nalor kata, la ong ba ka Russia ka thmu ruh ban pynjulor bad pynthut ia ki shlem bor ding ilektrik jong ka Ukraine da kaba phah thombor da ki drone bad ki ‘namding shimiet- shimiet.
Ha katei ka sngi la ong ba kitei ki shipai ka Russia ki la ther ia utei ‘namding bad u la leit dei ha katei ka jaka kaba don iwei i khyllung bad 2 ngut ki longkmie, ha kaba 4 ngut kiwei pat ki la mynsaw bad ngat ha katei ka jingjia.
Shuh shuh ruh la ong ba utei u ‘namding u la leit hap ha ka shnong Lyptsi, kumba 10 kilometre lane kumba 6 miles na khappud bad ka Russia.
La iathuh ruh ba wat ki dukan dawai bad ki dukan die mar-bam ki la julor ha katei ka jingbthei utei u ‘namding ha kane ka jingjia.
U Myntri ka tnat bor ding jong ka Ukraine, ha ka Sngi Balang u la iathuh ba ka Russia ka la thombor ia 2 tylli ki shlem sam bor-ding jong ka Ukraine ha ka miet kaba la leit baroh shi miet.
Katei ka jingjia ka la pyn julor ruh ia 2 tylli ki shlem pynmih bor-ding ha katei ka thaiñ bad ki jaka kiba hap ha katei ka thaiñ ki la hap ban shong dum namar ka jingduh bor-ding.
Ka tnat iada jong ka Ukraine ka la pyntip ruh ba ki la don haduh kumba 17 tylli ki drone bad 3 tylli ki ‘namding ba ka Russia ka la phah leit thombor sha Ukraine ha katei ka miet.
Namar kumba la ju iohi ruh ba ka Russia ka ju ialeh ban pynthud bad pyn julor ia ki shlem pynmih bor-ding jong ka Ukraine naduh ba sdang jong ka thma bad katba dang iaid ka thma baroh shi katta, khnang ba ka Ukraine kan nym lah ban pynbit- pynbiang ia ki jingdonkam jongka lada ka laiñ bor-ding ka thud.
Katei ka jingleh jong ka Russia, ka la pynlong ruh ia ka Ukraine ba kan phah leit kput ia ki shipai jongka da kaba ther bom sha ki thaiñ khappud ka Russia ba don ki jaka kynshew umphniang bad ki karkhana saiñ umphniang jong ka Russia.
Ha kaba ka Ukraine ka la pynbna ba katei ka jingleit thombor jongka ha katei ka por, ka la pynshitom tyngeh ia ka Russia bad ka long ruh ka jingsneng kaba biang tam na bynta ka Russia.
Ha kajuh ka por, u President ka Ukraine- u Volodymyr Zelensky ha ka jingiakren jong u ba man la ka sngi bad ki heh na kiwei pat ki ri ha ka thaiñ West, u la kyrpad ia kitei ki ri ba kin ai jingkyrshan ia ka Ukraine kumba ki la leh naduh kaba sdang ban ïatylli lang bad ban ialeh pyrshah ia ki kam pyni bor jng ka Russia da kaba leit ban thombor ia ki ri barit-baria bad ki bym kot bor ban iakhun pyrshah ia ka.
