Shillong, Ïaïong 11
U Myntri Rangbah ka Jylla u Conrad K Sangma ha ka Sngi Palei u la ong ba ki briew kiba la donkti ban shim ïa ka jingim jong uwei u nongbylla ha Mawlai Mawroh kin nym lait satia na ka kti jong ka aiñ bad ki pulit mynta ki dang tohkit ban kem ïa ki.
Lah ban kdew ba ha ka step Sngi Balang ka kynhun runar ba don kumba 6 ngut ki la leit ban thombor kyndit-kynsan ïa ki ar ngut ki bar jylla kiba trei bylla ha kawei ka ïing kaba don ha ka dong Lumsohkhlur ha Mawlai Mawroh. Uwei napdeng kitei u la khlad noh bad uwei pat u la mynsaw jur.
Haba kren sha ki lad pathai khubor ha ka Sngi Palei, u Myntri Rangbah u la pynrem ïa kane ka kam thombor bad ong ba ka jingtohkit ka la ïaid shakhmat ban ïoh kem ïa ki runar khnang ba kin shah pynsaja katkum ki kyndon aiñ.
U Myntri Rangbah u la pyntip ba hadien ba u la ïoh jingtip halor kane ka jingjia, u la ïoh ruh ban ïakren bad ki bahaïing jong utei u lanot ban pynpaw ïa ka jingsngewlem bad kular ba ka Sorkar kan shim khia bha ïa kane ka jingjia bad ban pynthikna ba ki ‘riew bymman kin ym lait na ka aiñ. U la pyntip ruh ba u la bthah ïa u SP ban leit mih sha hospital na ka bynta ban peit ba kan nym don kano-kano ka jingeh.
Nalor kane, u Myntri Rangbah u la pyntip ruh ba u la khot ïa ka jingïalang hapdeng u Chief Secretary bad u Director General of Police (DGP) na ka bynta ban ïakren bad ban bthah ba kin peit pyrman bad pyrkhing bha ïa ka jinglong-jingman ka suk ka saiñ ha Shillong bad ha kiwei kiwei ki jaka.
Shuh shuh u la pyntip ruh ba na ka liang jong ka Sorkar ka la shim khia halor kane ka kam, bad ong ruh ba yn sa pynkhlaiñ shuh shuh ka bor pahara bad lada donkam yn dang pan bor pahara shuh shuh na ka Sorkar Kmie.
