Shillong, Ïaïong 11
U Doloi ka Elaka Jowai, u Bah Pura Kynjing, u la kyntu ïa ki paidbah nongthep ‘vote’ ba kin mih ryntih ha ka 19 tarik Ïaïong ban jied ïa u MP sha ka Lok Sabha.
Na ka liang ka shlem treikam jong u Chief Electoral Officer (CEO) Meghalaya ka la pynlong da ka jingïalap ha Ïawmusiang, Jowai, ban pynsngewthuh paidbah halor jingkordor ka jingthep ‘vote’.
Haba ai jingkren, na ka liang u Doloi u la kyntu ïa ki nongshong shnong ka Jowai ba kin ïashim bynta ha ka jingsynshar paidbah namar kan pynkhlaiñ ïa ka nongrim jong ka imlang-sahlang bad kan pynthikna ba ka lawei jong ka jingsynshar paidbah kan long kaba phyrnai.
Nalorkata, u Doloi u la ong ba ka jingthep ‘vote’ ka long kaba kongsan ha ka jingsynshar paidbah bad ka dei ruh ka hok ha kaba ki nongshong shnong ki ïoh ïa ka lad laitluid ban jied ïa la u nongmihkhmat. U la ong ruh ba ka jingthep ‘vote’ kam dei eh tang ha ka hok, hynrei ka dei ruh ka jingkitkhlieh jong ki nongshong shnong baroh.
Na ka liang u Deputy Commissioner ka West Jaiñtia Hills, u Bah BS Sohliya, u la ong ba da ka jingthep ‘vote’, ki nongshong shnong kin lah ban jied ïa ki nongïalam kiba bha tam, bad ha kajuh ka por, ka pynkhlaiñ ruh ïa ka jingsynshar paidbah. U la ong ruh ba ka jingthep ‘vote’ ka long kaba kongsan namar ka dei ka lynti na ka bynta ki nongshong shnong ban saiñdur ïa ka lawei.
Ha kane ka sngi, U Sangot, uba dei u nongpyrta shnong bad uba ka shlem treikam u CEO Meghalaya ka la pyndonkam ban khring ïa ki nongthep ‘vote’, u la ïashim bynta ban pynsngewthuh ïa ki paidbah nongshong shnong ka Jowai. U Sangot u la ong ba ki paidbah ki dei ban ïakhun para ma ki mano kiba kloi tam ban leit thep ‘vote’ ha ki ‘Polling Station’ ha ka 19 tarik Ïaïong.
Ki nongthep ‘vote’ banyngkong tam, uwei u shynrang bad kawei ka kynthei, kin ïoh ïa ka lad ban thung tynrai dieng ha phyllaw jong ka ‘Polling Station’ ha kaba kan don ruh ka kyrteng jong ki hajan jong u tynrai dieng ba ki la thung.
