Patna, ïaïong:
U Myntri jong ka sorkar kmie uba dei khmih ïa ka tnat ki kam pohïing u Amit Shah u la kyntu ïa ki briew ba kin jied biang ïa u Modi na ka bynta ka sien kaba lai bad u la ong ba kane ka ilekshon ka long kaba kham kyrpang bad kongsan namar ba ka seng BJP kan wan biang ha ka bor synshar, ka ri kan sa wan ha ka kyrdan kaba lai jong ka jingriewspah napdeng ki ri ka pyrthei.
Ha ka jingai jingkren u Shah u la thalaiñ tyngeh pyrshah ïa ka seng Congress halor ka rukom pyntreikam kaba pyrthuh bud ïa ki nongwei bad kynnoh ba ka la trei na ka bynta ban phiah biang ïa ka ri.
U la kynthoh jur ïa ka seng ha kaba ïadei bad ka jingjur jong ka kam bamsap, ha kaba u la ong ba kito kiba la lute ïa ka pisa jong ki baduk kin ym lait na ki kti jong ka aiñ.
Ha ka jingai jingkren ha ka jingïalang paidbah kaba la long ha Guraru kaba ha Gaya distrik kaba don ha Bihar, u Shah u la pynshisha da kaba ong ba ka seng Congress ka lah ban leh lut tang na ka bynta ki ‘vote’.
“Ïa ka ri la phiah ha u snem 1947 da ka seng Congress. Mynta ka seng ka la bteng ban leh ïa ka. Ka seng BJP bad u Myntri Rangbahduh u Narendra Modi kin ym ailad ban leh kumta,” u la ong.
U Shah u la kdew halor ki jingkren jong u nongïalam jong ka seng Congress uba la kren da ki kyntien halor ka jingïapait hapdeng ka North bad ka South.
U la kynnoh ïa ka kynhun nongïalam jong ka seng Congress ba ka la shu sngap jar halor ka jingkren jong u bad kynnoh ba ka seng ka ju sngewtynnad ban bud ïa ki rukom pyntreikam ki nongwei na ka bynta ka lawei ha kaba ïa kane la sdang naduh ki por jong u Jawaharlal Nehru haduh u Rahul Gandhi.
Ha kaba ïadei bad ka kam bamsap, u la ong: “Ka kynhun synrop jong ka seng RJD bad ka Congress kam tip ba ka seng BJP bad u Modi kin ym pyllait ïa kiba donkti ha ka kam bamsap. Ki la dei ban pynphai noh ïa ka pisa baroh.”
U Shah u la ong shuh shuh ba ka kynhun NDA ka la wanrah ïa ka jingjop, ha kaba u la ong ba ki kam pyntriem jong ki lehnoh Maoist ki la kham duna ba mynta ki kam pynroi ki la don ha ka jingpyntreikam ha ki thaiñ ba ju shah ktah jur bad shah synshar donbor ha ki Maoist.
