Bengaluru, ïaïong:
U Symbud Myntri Rangbah jong ka Karnataka bad u President jong ka seng Congress u D K Shivakumar u la buh ka jingkyrpad ïa ka Election Commission ba kan hukum ïa ka sorkar kmie ba kan pyllait noh ïa ka pisa kaba T. 4,663 klur na ka National Disaster Response Fund bad ka jingai jingïarap shuh shuh kaba long da T. 18,171 klur sha ka jylla khnang ban lah ban ai jingïarap halor ka jingshah ktah jur na ka jingrang tyrkhong.
Ha ka shithi ba la phah sha ki heh nongpynïaid jong ka kam ilekshon kum u nongïalam jong ka seng Congress ha ka jylla, u la kdew shai ba ki la don kumba 224 tylli ki thaiñ na ki 236 tylli kiba la shah ktah jur na ka jingrang tyrkhong.
U la pynpaw ruh halor ka jingthoh ba dang phah shen da ka Myntri ka tnat pla tyngka jong ka sorkar kmie ka Nirmala Sitharaman ha ka jingïalang bad ki nongthoh khubor ha Bengaluru.
Haba ïakren halor ka jingkren jong ka Sitharaman ha ka jingïalang ba la pynlong bad ki nongthoh khubor, u Shivakumar u la ong ba ka sorkar kmie ka la phah jingthoh sha ka Election Commission ha ka 28 tarik, Lber ha kaba la pan jingbit ban pynlong ïa ka jingïalang jong ka High-Power Committee ban pynkhuid ïa baroh ki jingdawa ha kaba ïadei bad ka jingïarap ïa ki lanot kiba ïakynduh jingeh na ki jingthombor jong ki bor ka mariang, kynthup ha kaba ïadei bad ka jingïarap halor ka jingrang tyrkhong na ka byta ka Karnataka.
