Philadelphia, Iaïong:
Ki bor pyniaid ka nongbah Philadelphia ha ka Sngi Balang ki la pyntip ba 3 ngut ki briew ki la mynsaw na jingsynreit kuli ki 2 kynhun runar ha ka sngi ba rakhe ia ka Ramadan ha katei ka nongbah.
La ong katba ki pulit kim shym la pynithuh ne ai jingpynshai eiei haba iadei bad kane, tangba la iathuh ba ha katei ka sngi, ki paidbah kiba don ha katei ka nongbah ki dang leh kmen bad rakhe ia ka sngi ba kut jong ka jingleh niam Eid al-Fitr, ha kaba ki ju rakhe ban pynkut ia utei u bnai ba kyntang hapoh ka jingleh niam jong ki jaitbynriew Muslim.
U heh pulit ka Philadelphia, u Kevin Bethel u la ong ba ka long kaba donbok ba ha katei ka sngi ym shym la bun kiba ngat ne shah ktah ha katei ka jingjia wat la ka la leit jia ha kum katei ka sngi ba ki paidbah ki ia mih bha ha katei ka jaka namar ka jingrakhe pynkut ia u bnai ba kyntang jong ka jingleh niam ki jaitbynriew Muslim.
Ha katei ka sngi, la ong ba ha ka por shiteng sngi katba da ki hajar ngut ki paidbah ki dang ialum lang ha katei ka jaka ban rakhe ia ka sngi pynkut ia katei ka jing-leh niam, la ïohsngew kynsan ia 30 sien riew jong ki ktang suloi na katei ka jaka, ha kaba ki bor pyniaid bad ki pulit ki la leit ban mareh mar-mar bad ban tehlakam ia katei ka jingjia kaba la buh jingma ia u paidbah uba bun kiba dang ialum lang ha katei ka jaka.
