Shillong, Ïaïong 11
Kum shi bynta ban pynthikna ba ka ilekshon MP sha Lok Sabha kan long kaba ïaid beit ïaid ryntih, ki pulit jong ka West Khasi Hills District ki la nang pynkhlaiñ shuh shuh ka jingtalasi ïa ki kali kiba ïaid ba ïeng hapoh ka District bad khamtam ha khappud bad ka jylla Assam.
Kane ka jingtalasi ïa ki kali ka long kum shi bynta ban khanglad ïa kito ki briew ba thmu ban rah tuh ïa ka pisa, ka kyiad ne kiwei kiwei ki jingkit kiba lah ban pynthut ïa ka rukom ïaid beit bad long khuid jong ka ilekshon.
Kane ka jingtalasi ka long ha kylleng ki bynta jong ka West Khasi Hills khamtam ruh ha khappud bad ka jylla Assam ha kaba ki kali ki ïa rung ïa mih hapdeng kine ar tylli ki jylla ha khappud. Kane ka jingtalasi ka long kum shi bynta ba la bthah da ka Election Commission jong ka Ri India.
Ha kane ka jingtalasi, na ka liang jong ki pulit bad kumjuh ki briew ba la buh da ka tnat Ilekshon ki la ïoh ban kurup ïa ka kyiad pyrsi ha kaba ki pulit ki la rah ïa kane ka kyiad bad theh noh sha madan ban pynduh, ki pulit ki la rah ruh ïa ki khiew kiba shet ïa ka kyiad pyrsi kiba la kurup na ki dukan ba ki die.
