Shillong, Ïaïong 11
Ka Ryntih SC ka la pynliem ïa ka Nangkiew Irat SC da 3-1 kol na ka bynta ban wanphai da ka jingjop ha ka lympung ïalehkai Shillong Premier League 2023-24 ba la pynïaid da ka Shillong Sports Association ha ka Sngi Palei.
Kane ka nam jop ka la wan urlong lyngba u Baneh Khongsdam, Andy Mawthoh bad u K. Lalrosangra, katba na ka Nangkiew Irat la pynphai kylla shi kol lyngba u Banshanlang Nongdhar.
Ha kane ka jingïakhun kaba la long ha SSA Stadium baroh ar ki kynhun ki la pyrshang ban ïakhun tyngeh naduh kaba sdang. Ka Nangkiew Irat ka la ïoh ban pynkhih jar nyngkong eh ha ka minit kaba 16 lyngba u Banshan -lang. Kane ka shi kol ka la ïai neh haduh kaba kut jong ka kylla step na ka daw ba ka Ryntih kam shym la lah ban pynphai.
Wat la dangshen ha ka jingïalehkai ba la dep, ka Ryntih ka la shah rem ha ka Rangdajied United da 4-0 kol, pynban ha kane ka jingïakhun ka la pyrshang ban iakhun tyngeh bad dei ha ka kylla miet ba ka la lah ban pynphai kylla lyngba u Baneh ha ka minit kaba 55 na ka bynta ban ïakhaid mar shi kol.
Hadien katto katne por kane ka kynhun ka la pynbud biang ïa ka kol kaba ar lyngba u Andy Mawthoh ha ka minit kaba 73. Hashwa ban wai ka la thep biang sa shi kol ha ka minit kaba 83 lyngba u K. Lalrosangra. Haduh kaba kut ka Ryntih kam shym la lah shuh ban pynphai bad ka la mad ïa ka jingshah rem kaba lai ha kane ka lympung.
Lyngba kane ka jingjop, ka Ryntih mynta ka la jam sha ka kyrdan ba saw ha kaba ka la kamai 7 point na ki san sien ïakhun. Te kumta kane ka kynhun ka la ïaryngkat ha ka jingkamai point bad ka Mawlai SC (kaba la ïakhaid mar 1-1 kol mynta ha ka 23 tarik u Lber). Katba ka Nangkiew Irat ka la ïai sah ha ka kyrdan ba hynñiew ha kaba ka la ïaryngkat mar 3 point bad ka Nongthymmai.
Ka jingïalehkai ha ka sngi Thohdieng kan long hapdeng ka Nongthymmai SC pyrshah ïa ka Mawlai SC ha ka por 3 baje janmiet.
