Nongpoh, Ïaïong 11
Ka shnong Sohkyndur bad ka NPP Ri-Bhoi ki la pynrem jur ïa ki runar kiba la leit ban kawang maw ïa ka ïing sah jong ka MDC ka Umsning ka Kong Macdalyne S Mawlong kaba ha Mawleiñ Mawkhan (Ladsharai) ha ka janmiet Sngi Balang.
Ki nongïalam ka shnong Sohkyndur hapoh ka jingïalam u Rangbah Shnong Bah S Mawlong, ki la pynrem jur ïa ki runar kiba donkti ban leit kawang maw ïa ka ïing sah jong ka MDC Umsning.
U Bah S Mawlong ryngkat ka Dorbar jong ka shnong Sohkyndur lem bad ki dkhot jong ka Executive Committee haba ïakren bad ki nongthoh khubor ha ka Sngi Palei, u la ong ba kane ka jingleit hiar thma ïa ka ïing sah jong ka Kong Macdalyne Sawkmie Mawlong ka la ktah ïa ka shongsuk-shongsaiñ hapoh ka shnong ka thaw hi baroh kawei.
U la ong ruh ba ka shnong ka buh ïa ka jingmaham ba lada lap nangne shakhmat, ka shnong kan pynsaja bad leh da kaba tyngeh bad ruh ban aiti sha ki bor jong ka aiñ ïa kum kine ki runar kiba donkti ban leh ïa kum kine ki jait kam kiba ktah ïa ka shongsuk-shongsaiñ hapoh ka shnong ka thaw.
Utei u nongïalam shnong u la pynshai ruh ba kum ka shnong, kam don satia ïa kano-kano ka jingïashah liang ïa kino-kino ki seng saiñ hima-sima lada ki wan ban pynlong jingïalang hapoh u pud u sam jong ka shnong ka thaw bad kum ka shnong hi ka pdiang sngewbha ïa baroh, hynrei kan nym ailad pat ba kum kine ki jingjia ki dang wan jia hapoh u pud u sam jong ka shnong.
Ha kawei pat ka liang ka NPP Ri-Bhoi District bad Umsning Block haba pynrem jur ïa ki ‘riewbymman kiba thmu sniew ïa ka MDC ka seng na Umsning ka Kong Macdalyne S Mawlong, ka dei tang ka jingleh ‘riewkhlaw bad jinglong khawpud.
“Ka NPP Ri-Bhoi bad Umsning Block ka pynrem jur ïa ka jingleh ‘riewkhlaw jong ki ‘riewbymman, kiba la leit thombor ïa ka ïing sah ka MDC,” la ong u Bah Clement Mawlong, President NPP Ri Bhoi.
Lah ban kdew, ba ka ïing sah jong ka MDC Umsning Kong Macdalyne ka la shah lun maw ha ka janmiet Sngi Balang ha ki ‘riewrunar ki bym lah satia ban tip ki dei kiei. Kane ka jinglun maw ka la jia ha ka por ba kane ka MDC ka dang ïeng kren ‘phone’ ha phyllaw ïing bad ka la shu lait salit na ki jingma.
“Ka MDC ka dang ïeng ha phyllaw jong ka ïing sah ha ka por ba shah lun maw ha ki briew kiba ïaid lynti, kiba don ka jingthmu ban pynmynsaw ïa i da kaba kawang maw. Ngi sngewnguh ïa U Blei uba la ïada ïa ka MDC na katei ka jingthmu ba sniew ki runar,” la ong u Bah Clement.
