Shillong, Ïaïong:
Ka Thma U Rangli-Juki (TUR) ka la pynrem jur halor ka jingshah thombor bad ka jingshah ktah-kti jong ki nongtrei bar jylla ha Mawlai Mawroh ha ka Sngi Balang kaba la ïalam wat shaduh ka jingkhlad jong uwei u briew bad mynsaw ar ngut.
Ka TUR ka la ong kham ha shwa kane ka jingjia ka la don ka jingshah thombor bad ka jingshah pynïap jong ki bar jylla ha Ichamati bad ki jingjia byrngem-byrsit ïa ki nongtrei kiba trei ba ktah ha Sohra.
“Ki jingjia thombor kum kine ki long ka jingjah burom ïa ka imlang ka sahlang jong ngi baroh kawei bad baroh ki nongshong shnong ka jylla kiba don ka jingsngewthuh ki dei ban pynrem ïa kine ki briew kiba leh ïa kum kine ki kam bad ka jingkem ïa kine kiba leh ïa ki kam beaiñ dei ban kem mardor ïa ki”, la ong ka TUR.
Ka TUR ka la ong ba ka long kaba donkam ba ki nongmihkhmat ne ki nongïalam jong ki sengbhalang kiba ju pyndonkam ïa kine ki jingjia ban kynshoit bad pynmih ka jingsngewïapher jaitbynriew ba kin buh jingkylli ïa ka rukom treikam ka aiñ bad ba dei ban pynngat ïa kita ki runar kiba ju mlien ban leh ïa kum kine ki kam.
Shuh shuh ka TUR ka la ong ba ka long kaba donkam ban pyrkhat ba kine ki jingjia bad ki jingthombor ïa kiwei pat ki kynhun kan ïalam sha ka jingpynkharoi ïa ki kam sniew bad ki kam ïaumsnam ba kin rung bad kan ailad ruh ïa ka kynhun ki runar ba kin leh katba ki mon bad kane kan buh jingma ïa ki paidbah baroh.
“Kumno ki rit paid ki la shah leh hapoh ka imlang ka sahlang ka long ka dak ka jinglong-jingman jong kato ka imlang ka sahlang hi. Lada ngi kum ka imlang ka sahlang ngim pynrem bad ngim kiar na kaba kum kine ki jingthombor bad ki jingsngew ïapher jaitbynriew, ka mut ngim sngewdei ban sngewktah lada don kano-kano ka jingjia shah thombor hapoh ka Ri India baroh kawei”, la bynrap ka TUR.
Ka TUR ka la pynkut da kaba ong ba ka jingsngap jar halor katei ka jingjia shah thombor bad ka jingleh riewkhlaw hapoh la ka jong ka jaka ka puta ka long kaei- kaei ka bym lah satia ban pdiang.
