Shillong, Ïaïong:
Ka Meghalaya BJP ka pynrem jur halor ka jingjia kaba la jia ha ka Sngi Balang ha Mawroh, ha kaba uwei u briew u la duh noh la ka jingim katba 2 ngut kiwei pat ki la mynsaw jur.
Ha ka kyrwoh, u State President ka BJP, u Rikman G. Momin u la ong, “Ïa kane ka jingleh khawpud, ka jingleh bym kheiñ briew hap ban pynrem da baroh ki liang jong ka imlang-sahlang. Kiba kum kine ki jingjia, ki wanrah ka jingjah burom ïa ka Jylla baieid jong ngi bad ka jingsheptieng hapdeng baroh ki nongshong shnong ka Meghalaya, khlem da kheiñ na kano-kano ka jaidbynriew ba ki dei.”
“Dang shen, ka la don ka jingkiew ha kiba kum kine ki jingjia be-aiñ ba ishyrkhei. Ki khubor kiba kyndit ki la mih na ki bynta bapher-bapher jong ka Jylla, bad ym lah shuh ban pdiang ïa kiba kum kine ki jingjia da ki nongshong shnong ba shong suk shong saiñ ka Meghalaya. Nga kyntu ïa ka Sorkar Jylla ban leh eiei mardor bad dawa ka jingpynshitom kaba tyngeh ïa kiba donkti ha katei ka kam,” la ong u Momin
Shuh shuh utei u nongïalam ka seng u la hap ban ieh noh shiteng ïa ka jingleit jngoh jong u ïa ka Ri-lum Garo ban wanphai sha Shillong, khnang ba u la ban pynpaw da lade ïa ka jingsngewlem sha ka longïing ha ryngkat ka jingdonlang ha syndah bad kito kiba la mynsaw ha katei ka jingjia.
