Tura, Ïaïong 11
Kiba bun na ki Nokma ha ka thaiñ Tura ki la pynpaw ka jingpyrshah ïa ka saiñdur lane ka ‘Draft Master Plan’ na ka bynta ka sor Tura ba la pynkhreh da ka tnat Pynroi Sor jong ka Sorkar Meghalaya.
Ha ka jingthoh sha u Director ka tnat Pynroi Sor, ki Nokma jong ka Chasingre, Edenbari, Allotgre bad Me’gonggre ki la pynpaw ïa ka jingpyrshah ïa ka saiñdur na ka daw ba ki khlem ïoh jingtip lypa ba kan don ka jingpynkhreh ïa kata ka saiñdur.
Kitei ki Nokma ki la kdew ba ki sngewbit sngew -biang ban don hapoh ka jingsynshar jong ka Garo Hills Autonomous District Council (GHADC) bad ki la ong ba kim sngewïahap ban don hapoh artylli ki bor synshar.
Ha kajuh ka por, ki la pynpaw ïa ki jingbym biang kiba bun ha kaba ïadei bad ka byrta ba la pynmih halor kata ka saiñdur.
“Ka byrta ka khlem pynpaw mano ki ban hap ban aiti noh ïa ka bor halor ki jaka kiba ïa mynta ki hap hapoh ki A·king bapher-bapher bad kino ki jaka ki ban hap hapoh ka jingpeit jong ka tnat pynroi sor ka sorkar Meghalaya katkum ka saiñdur na ka bynta ka Tura. Ha kajuh ka por, khlem pynpaw shai ruh kumno yn pyndonkam ïa ki jaka ba hap hapoh ki A·king bad kumno ka tnat pynroi sor kan shim ïa ki. Shuh shuh ka byrta ka khlem kren eiei kaei ka ban jia lada mih ki kynrum-kynram ha kaba ïadei bad ka aiñ halor ki jaka kiba la shah kynthup ha ka Master Plan. Kine ki jaka ki don mynta bad ki A·king jong ki Kur bapher-bapher bad la pynïaid ïa ki da ki Nokma,” la ong kitei ki Nokma.
