Shillong, Ïaïong 11
U President ka NPP Meghalaya, Bah Prestone Tynsong uba dei ruh u Symbud Myntri Rangbah ka jylla, u la kyntu ïa ki paidbah ba kim dei ban ngeit ïa kane ka seng saiñ pyrthei kaba thymmai namar um kwah ba ki paidbah kin shah pynbiej kumba shah ïalam bakla ha uwei u nongïalap niam shwa ban jam ïa u snem 2000.
Haba ai jingkren ha ka jingïalang ïalap ilekshon ïa ka Kong Ampareen Lyngdoh ka kyrtong NPP na Shillong constituency kaba la long ha ïew Wahïajer, West Jaiñtia Hills ha ka Sngi Palei, u Bah Prestone u la pynkynmaw mynba u dang long kum u nongtrei sorkar ha u snem 1999 la don uwei u nongïalap uba la leit pynsngewthuh bakla ïa ki paidbah ban die noh ïa ki jingdon-jingem ban leit sah noh sha khlaw namar mar shu palat ïa ka 12 baje mynmiet jong ka 31 tarik Nohprah, 1999 kin sa kiew im sha bneng mar shu poi u snem 2000.
U la ong ha kito ki por ki briew haba ki la ngeit ki la ïalam ïa ki khun kiba dangrit ban sah sharud jong ka shnong. Hynrei kaba lyngngoh ka long ba mar shu poi u snem 2000 kam shym la urlong kumba la batai bad hadien pat kita ki briew haba ki leit wad ïa uta u nongïalap kim lap shuh.
“Kaba nga sngewsih ka long ba kine ki khun mynta haba ki la heh kiba la poi palat 24 snem naduh u snem 2000 haba kim ïoh leit skul, ki la kylli ïa ki kmie ki kpa balei ngi duk haduh katne bad ka jubab na ki kmie ki kpa ba ngi la shah ïalam bakla” la ong u Bah Prestone.
U Bah Prestone u la ong ba ka jingkhluit bad jingshit kane ka ilekshon MP mynta u snem ka daw ka dei ba mih ka seng VPP kaba la kynnoh ïa kine ki seng saiñpyrthei kiba la rim ki dei tang ki nongpop suda namar ïalade kine ki nongïalap ki sngew kaba hok.
U la ong ba kine ki nongïalam VPP wat ïa ki nongïalam Balang ki kynnoh ba ki dei kiba sam kyiad. Namar kata, u la kyntu ïa ki nongïalam Balang wat nym ïatai nia bad ki namar kin pyneh beit ïa ka nia jong ki, hynrei ha ka 19 tarik kaba dei ka sngi thep ‘vote’ leit ñion beit ha ka shap jong ka kot.
Ha kane ka sngi la ïoh ka jingkren na u Bah Sniawbhalang Dhar uba dei u Symbud Myntri Rangbah ka jylla, Bah Wailadmiki Shylla, Kong Santamary Shylla, Bah HM Shangpliang ha ka jingïadonlang ki nongkitkam ka NPP bad ki paidbah.
