Silchar, ïaïong:
Kum shi bynta ban pynkhreh ïa ka ilekshon paidbah ka ban long ha ka 26 tarik, Ïaïong, ki heh nongïalam ba paw khmat jong ki seng saiñ pyrthei ki la shahjied bad dei ban don bynta ha ki jingïalap ilekshon ha Barak Valley ha ka taïew ban wan.
U President jong ka seng BJP ha ka ri u J P Nadda un sa ai jingkren ha ka jingïalang paidbah ka ban sa long ha Silchar DSA Ground ha ka 16 tarik, Ïaïong. Hadien ba la dep ban pynbna shaphang ka jingdon bynta jong u ha ka jingïalap ilekshon ha Silchar, u Nadda un sa leit sha Karimganj ban don bynta ha kawei pat ka jingïalap ilekshon ha katei ka jaka.
Ka heh nongïalam jong ka seng TMC ka Mamata Banerjee ruh kan sa leit sha Silchar ha kajuh ka sngi. Ka Banerjee kaba long ruh ka Myntri Rangbah jong ka West Bengal kan sa leit ban ïalap ilekshon na ka bynta ban pynïoh jingkyrshan ïa u kyrtong jong ka seng u Radheshyam Biswas.
Ha kaba ïadei bad kane, ïa ka jaka ban pynlong ïa ka jingïalang paidbah jong ka Banerjee ym pat lah ban pyntikna. Ka seng TMC ka la pynïakhun ïa ki kyrtong ka seng ha ki saw tylli ki konstitwensi ha Assam. Ha ka 20 tarik, Ïaïong, u Myntri Rangbah jong ka Assam u Himanta Biswa Sarma un sa don ha Silchar na ka bynta ka jingleit jngoh ba ar sngi sha Barak Valley.
U Sarma un sa don bynta ha kiba bun ki jingïalang paidbah ha baroh ar tylli ki distrik, kata ha Karimganj bad Hailakandi kiba kynthup ïa ka Karimganj Lok Sabha konstitwensi. Ha ka 21 tarik, Ïaïong, u Sarma, un sa leit phai sha Silchar.
