Shillong, Ïaïong 12
U Bah Prestone Tynsong, uba long u Symbud Myntri Rangbah ba dei peit ïa ka tnat pulit, u la ai jingbthah ïa u khlieh duh ka tnat pulit ka jylla lane u Director General of Police (DGP), u Dr LR Bishnoi, ban pynthikna ba kan don ka shongsuk ka shongsaiñ ha ka jingïalap ilekshon MP Lok Sabha.
“Nalor jong u DGP, la bthah ruh ïa ki SP bad ki DC ha baroh ki distrik ba kin peitngor ha ka jingïalap ilekshon Lok Sabha, bad ban pynthikna ba ka shongsuk-shongsaiñ kan don,” la ong u Bah Prestone.
U Symbud Myntri Rangbah u la ong ba ïa katei ka jingbthah la ai hadien ka jingmih jong ki jingjia ha kaba la don ki ‘riew shim kabu kiba la leit ban pynthut ïa ki jingïalap ilekshon jong kiwei pat ki seng saiñ-pyrthei kiba ïashim bynta ha kane ka ilekshon MP.
Shuh shuh u la ong ba la dep ban ai da ka jingbthah kaba tyngeh sha u DGP bad sha ki bor distrik baroh ba kin long kiba shimkhia ha man kawei-pa-kawei ka jingïalang ïalap ilekshon khnang ba kan ym mih kano-kano ka jingjia kaba lah ban ktah ïa ka shongsuk-shongsaiñ.
Ha kajuh ka por, u la pynpaw ïa ka jingkyrmen ba nangne shakhmat, ka jingïalap ilekshon ba dang sah kan ïaid beit khlem kino-kino ki jingjia.
Lah ban kdew ba ka jingïalap ilekshon MP ha Meghalaya kan kut noh ha ka janmiet jong ka 17 tarik Ïaïong bad ka jingthep ‘vote’ kan long ha ka 19 tarik Ïaïong.
