Jowai, Ïaïong 12
Ka Jaiñtia Hills Development Society (JHDS) ha ryngkat ka jingïatreilang bad ka KHUBLEI Germany, mynta ka kynti ki la ïoh ban plie paidbah ïa kawei ka ïingskul bathymmai kaba don 8 tylli ki karma klas ha Tome Memorial Hr. Sec. School Mooralong Jowai. Ïa kane ka ïingskul bathymmai la plie da u Kongsan jong katei ka sngi u Gerhard Albert uba dei u President ka KHUBLEI Germany, ha ka 12 tarik u Ïaïong 2024 ha ryngkat ka jingïadonlang u Most Rev. Ferdinand Dkhar, Bishop ka Jowai Diocese, U Additional Deputy Commissioner ka West Jaiñtia Hills u Bah F.B. Basan, u Director ka Jaiñtia Hills Development Society u Fr. Manbha Pakem, u Bah D. Lamare, Secretary/Supervisor Education Department, West Jaiñtia Hills, u Fr. Martin Shylla, Vicar General ka Jowai Diocese, ki Rangbah Shnong, ki Phadar, ki Sister bad kiwei de ki nongshah khot sngewbha.
Haba ai jingkren ha katei ka jingïalang, u Sir. Gerhard Albert u la ai ka jingïaroh ïa ka Jaiñtia Hills Development Society, ka School Managing Committee, ki Nonghikai bad kiwei kiba don bynta ban pynïeng ïa katei ka ïingskul. U la kyntu ruh ïa ki kynnnah skul ba kin pyndonkam hok ïa katei shlem jinghikai na ka bynta ka jingmyntoi bad ka lawei babha jong ki. U la pynpaw ruh ïa ka jingkyrmen ba kane ka skul kan ïarap ban ban pynbha shuh shuh ïa ka rukom hikai bad jingpule ba kham shalor.
La ïoh ïa ki kyntien maitphang halor katei ka project na U Director ka JHDS u Fr. Manbha Pakem uba la pynshai halor ki kam bad ki jingtrei kiba ka JHDS bad ka la leh ban wanrah ïa ka roi ka par halor ki liang baroh da ka jingïatreilang kiba bun ki kynhun treimon sngewbha.
U Bishop jong ka Jowai Diocese u Most Rev. Ferdinand Dkhar u la kyntu ruh ïa ki bor khmih jong katei ka skul ba kin pynleit jingmut ruh ha ki sap ki talent kiba ki khynnah skul ki don khnang ban wanrah ïa ka jingroi jingpar ha baroh ki liang.
La pynphuh-pynphieng ruh ïa kane ka sngi da ki jingshad bad jingrwai ba itynnad ba la ïashymbynta da ki khynnah skul jong katei ka shlem ai jinghikai.
