Shillong, Ïaïong 12
U President ka National People’s Party (NPP) ha Meghalaya, Bah Prestone Tynsong, u la ong ba lada ka Tura Lok Sabha konstitwensi ka lah ban sei ïa ka longkmie kum ka MP, balei ka Shillong Lok Sabha konstitwensi ruh kam lah bad u la khot ruh ïa ka Voice of the People Party (VPP) ban ïatrei-lang ban pyneh daw ïa ka jaitbynriew.
U Bah Prestone u la pynpaw ïa kane haba leit ïalap ilekshon na ka bynta ka kyrtong ka NPP ka Kong Ampareen Lyngdoh ha Mawlai Phudmuri Stand Bus ha ka Sngi Thohdieng.
U Bah Prestone u la kren shaphang ki kam pynroi kiba ka Sorkar ka la pyrshang ban wanrah ha Mawlai konstitwensi naduh u snem 2018 bad u la kren shaphang ki projek shna surok kum ka surok thymmai na Mawlai Bypass sha Umroi kaba la ïaid shaid-shaid mynta, ka Shillong Engineering College kaba don ha Mawlai, bad kiwei kiwei ki kam pynroi.
U la ong ba ka Sorkar kan nym ieh ïa ka Mawlai ha ki kam pynroi bad u ai ka jingïaroh ïa u MDC ka Mawlai u Bah Teiborlang Pathaw uba ju trei shitom na ka bynta ka konstitwensi wat lada u shah kynthoh ba u leh MLA jubor.
U la ong ba ki MLA ka VPP pat ki ong ïa ki paidbah ba ka dei ka kamram tang jong ka Sorkar wat haba ki paidbah ki la jied ïa ki MLA ban peit lem ïa ki jingeh bad ka khia ka shon.
Kumta u la ong ba katba nang pynrem, ka jingieid ka nang jur ban leh ïa ki kam pynroi ha Mawlai.
U Bah Prestone u la ong ba ym tang ki aiñ kiba donkam ban shna, hynrei donkam ruh ban trei na ka bynta ka roi ka kiew jong ka konstitwensi.
Namar kata, u la buh jingkylli ïa ki MLA ka VPP da kaba ong ba la shisnem tam mynta aïu ki la trei na ka bynta ka jaitbynriew ha kaba u la buh jingkylli ruh ïa ka jingïakhih halor ka reservation policy.
Une u nongïalam ka NPP u la ong ba lada jied ïa ka Kong Ampareen kum ka MP kan long ruh ka ksiang hapdeng ka Sorkar Jylla bad ka Sorkar Pdeng ban kren bad buddien lang haba don ka jingeh kum ka jingbym pyllait pisa ïa ki skhim naduh ka MGNREGS, SSA bad kiwei kiwei.
Haba kyntu ïa ki paidbah ban jied ïa ka Kong Ampareen kum ka MP kaba thymmai kaba dei ka longkmie ban leit sha Parliament ban mihkhmat ïa ka jaitbynriew bad ka Jylla, u Bah Prestone u la ong ba lada ka Tura ka lah ban sei ïa ka Agatha K Sangma kum ka MP, balei ka Shillong ruh kam lah.
Ha kajuh ka por Bah Prestone u la khot ïa ka VPP ban ïatreilang noh ban pyneh daw ïa ka jaitbynriew da kaba phah ïa ka Kong Ampareen kum ka MP.
Ha kane ka jingïalang ïalap ilekshon, ki paidbah ki la wan ban sngap bad ai jingkyrshan ïa ka NPP ha kane ka ilekshon Lok Sabha na Mawlai.
