Shillong, Ïaïong 12
Ka Meghalaya Human Rights Commission (MHRC), Shillong, ka la pan kaiphod na u heh duh (DGP) ki pulit ka jylla ha kaba ïadei bad ka jingshah pynïap jong uwei u nongbylla shna ïing ha Mawlai Mawroh ha ka 10 tarik Ïaïong.
Ha u kyrwoh khubor, ka MHRC ka la ong ba ka la shim ïa katei ka jingjia, bad ka la phah shithi sha u DGP ba u dei ban phah ïa ka kaiphod lane ka ‘Action Taken Report’ hapoh 15 sngi.
Lah ban kdew ba ha ka 10 tarik Ïaïong ha ka por kumba 11:15 mynstep, ki runar ki bym lah ban ithuh ki la thombor ïa lai ngut ki nongbylla shna ïing ha Mawlai Mawroh. Namar kane ka jingshah thombor, uwei na kine ki lai ngut ki nongbylla ïa uba la tip kyrteng kum u Arjun Ray, 52 snem ka rta, u la mynsaw jur, bad u la khlad noh ha NEIGRIHMS ha kajuh hi ka sngi.
Na ka liang ki pulit ka East Khasi Hills ki la pynrung da ka ejahar halor katei ka jingjia, hynrei haduh mynta, ym pat ïoh kem satia ïano-ïano.
