Guwahati, ïaïong:
Na ka jingkhmih bniah ha kaba ïadei bad ka ilekshon Lok Sabha la ïathuh lypa ba ka seng BJP kan sa jop ha ki 7-8 tylli ki konstitwensi ha ka jylla Assam. Katba ka seng Congress kumba la khmih lynti, la ong ba kan sa jop ha ki 4 haduh 5 tylli ki konstitwensi kiwei pat kin sa ïoh ïa ka jingjop ha ki 2 tylli ki konstitwensi.
Ka seng BJP ka la pynpaw ïa ka jingduh jingkyrmen ha ki katto katne tylli ki konstitwensi bad ka la don ka jingartien ban jop kput ha kiwei pat kiba dang sah. Kum shi bynta ban pynkhreh ïa ka ilekshon, ka seng BJP ka la ïaleh ban pynkhlaiñ ïa ki jingpyntreikam bad pynjur ïa ki jingleit ïalap ilekshon.
U Myntri jong ka sorkar kmie uba dei khmih ïa ka tnat ki kam pohïing u Amit Shah un sa leit ban jngoh ïa ka Manipur ha ka 15 tarik, Ïaïong, la ïathuh ki heh sorkar, ha ka sngi Palei. U Myntri ka tnat ki kam pohïing un sa ai jingkren ha ka jingïalang paidbah ka ban sa long ha ka nongbah. Kane kan sa long ka jingleit jngoh ha ka sien kaba ar jong u Shah sha ka jylla hashwa ban pynlong ïa ka General Elections.
Ka jylla kan sa pynlong ïa ka jingthep vote ha ka 19 tarik, Ïaïong bad ka 26 tarik, Ïaïong. Ka seng Bharatiya Janata Party (BJP) ka la pynïakhun da u Myntri barim jong ka tnat pule-puthi, u T Basanta Kumar kum u kyrtong na ka bynta ka Manipur konstitwensi kaba kynthup ïa ki distrik ha ki jaka them kynthup ka Imphal. “Ngi la ïoh jingtip ba un sa wan jngoh ïa ka jylla ha ka 15 tarik, Ïaïong. Kane kan long shi bynta ka jingleit ïalap ilekshon na ka bynta ka ilekshon ban wan. Ki jingpynkhreh ha kaba ïadei bad ka jingleit jngoh jong u Shah ki la ïaid shakhmat,” la ïathuh shuh shuh u heh sorkar.
