Ha ka jingïalap ilekshon MP Lok Sabha kaba dang ïaid, ka la don ka jingïakren bad jingkob ïa ki MLA ban pyni ba haduh katno ki la lah ban shna surok. Ha ka banyngkong, kam dei ka kamram jong ki MLA ba kin shna surok, ka dei jong ka sorkar jylla ne Sorkar Pdeng. Ki MLA ki lah ban phah ïa ki jingai jingmut lane ban ïasaid lem na ka bynta ki jaka kiba donkam ïa ki surok, hynrei ban shna pat, ka dei ka bynta jong ka sorkar. Naei ki MLA kin ïoh pisa ban shna surok kiba shongdor da ki phew klur tyngka? Ka bynta kaba ar ka long ba ki MP ruh kim don jingïadei eiei bad ka jingshna surok. Ma ki ruh, kumba long ki MLA, ki lah ban shu leit ïakren ne pynsngew ne pyni ïa ki jingdonkam ban ïoh surok ha ki konstitwensi jong ki, hynrei ki MP kim don bor ne pisa ban shna surok.
Kaei ka kamram jong ki MLA ne MP? Ka kamram ba hakhmat eh ka dei ban thaw aiñ namarkata la jied ïa ki sha ka Ïingdorbar Thawaiñ. Kane ka kam thaw aiñ ka la kham kylla mynta namar ka sorkar, kaba don ha ka liang synshar, ka la shim hi ïa ka jingkitkhlieh ban thaw aiñ bad ynda ka la dep pynkhreh, ka wanrah ïa kito ki aiñ rew hapoh ka Ïingdorbar ban shim ïa ka jingmynjur jong ki MLA ne MP. Watla katta ruh, ki MLA ne MP ki lah ban wanrah ïa la ki jong ki aiñ bad ka shong ha ka Ïingdorbar la kan pdiang ne kyntait ïa kita. Haba wanrah ïa ki aiñ rew hapoh ka Ïingdorbar, ka dei ka kamram jong ki MLA ne MP ban kdew ïa ki jingduna/jingbakla lane ban wanrah jingtyrwa ban pynkylla ne pyndap ne pynbit pynbiang ïa kita ki aiñ rew.
Kata ruh ka shong ha ka jingstad bad ka jinglah jong ki MLA ne MP ban sngewthuh bad shemphang halor ki aiñ. Don kiba lah ban ïasaid tyngeh bad don kiba hap ban hun da kaba shu shong bad sngap namar kim da don ka jingsngewthuh ne ka jingkhlaiñ ha ka jingshemphang halor ki aiñ ki kanun kiba dei bad ki bym dei ban treikam ha ka jylla ne ha ka Ri. Tangba ha kaba khatduh, ka sorkar kaba don ha ka liang synshar ka ïoh lem katba ka mon ban ïoh ïa ka jingmynjur jong ka Ïingdorbar namar ka bun paid, bad lada ki MLA ne MP kiba don ha ka liang pyrshah ki ai jingmut ruh, kam don jingmyntoi namar ka sorkar kan ym sngap.
Namarkata, hap ban sngewthuh bha ïa ka kamram bad jingkitkhlieh jong ki MLA ne MP. Hooid, ki don ïa ka MLA ne MP Skhim, hynrei kam pat dap ban pynshna wat tang shiteng pawa jong ka surok. Ka dei ka jingkitkhlieh jong ka sorkar ban leh ïa kane ka bynta. Kam myntoi ban kren kob ha ki paidbah ïa kaei kaba ki MLA ne MP kim don bynta ban leh. Lada ki nongthaw aiñ kin kylla noh ki nongshna surok, aïu ka ban jia? Mano ban thaw aiñ lada ki MLA ne MP ki hap kylla ki nongshna surok? Ha Ïingdorbar la hap ban shu ïakren beit tang shaphang ki surok bad ym shuh halor ki aiñ ki kanun bad ki kpait saiñ kam. Hooid, ki surok ki donkam, tangba hap ban da tip ka dei ka jingkitkhlieh jong no ban shna ïa kita ki surok kiba katno inshi ne kilometre. Ban shu ïakren khlem da tip ka long ka kam biej, bad ha ka ilekshon, ym dei ban shu ïalap da ka jingbiej ne jingpynbiej. Ym baroh kiba biej ne kiba lah ban shah pynbiej.
Husiar paidbah na ka jingshah pynbiej bad jingshah ïalam bakla. Ngi dei ban long ki paidbah kiba don ka jingtip bad ym ban shu shaniah ha kiwei. Katba ngi dang shaniah ha kiwei, ngin ym lah ban pynïapher hapdeng ka lamler bad ka jingshisha. Ngi dei ban long kiba shemphang bha. Ka jingjied ne jingbym jied ïa u ne ka kyrtong ha ka ilekshon kan shong ha ka jingstad ka jong ngi. Lada ngi shu sngap tang ïa ki nongïalam bakla, ngin poi sha ka jingbabe. Ha kane ka pyrthei stad, ki bun kiba kwah ban ïalam ïa kiwei namar ki sngew ba ki kham stad. Tangba ngim lah pat ban phet ne lait na ki jingshisha kiba ïaineh bad kiba ym lah ban kylla kam pher wat lada ngi shah ïalam bakla ne shah pynbiej. Ki jingshisha kin neh beit ki jingshisha la ka dei ha kane ka aïom lane ha kiwei pat ki por.
