Shillong, Ïaïong 12
Ka khubor na ki pulit ha ka Sngi Thohdieng ka la pyntip ba uwei u nongshong shnong ka nongbah u la ujor ba ha ka 11 tarik Kyllalyngkot, 2024 ha ka por kumba 1:48 mynsngi, u la ïoh ïa kawei ka jingthoh lyngba kawei ka “Telegram Channel” ha kaba ïadei bad ka jingbei pisa.
Na ka liang jong uta u nongshong shnong u la bud ïa ka jingbthah bad u la thep ïa ka pisa kaba T. 46,228 ha ka kyrteng jong u ‘Mansuri Sohilbhai’ bad u Moin Khan. Hynrei kham hadien, uta u nongshong shnong u la sngewthuh ba u la shah shukor.
Ha kawei pat ka jingjia, u Narayan Chakraborty u la ujor ba ha ka 8 tarik Ïaïong, ki runar ki bym lah ban ithuh, ki la leit rung sha ka ïing sah jong u ha Nongrimmaw, Laitumkhrah, bad ki la tuh ïa ka ksiar ka ksah bad rupa ba shongdor T. 1.5 lak, pisa T. 20,000 bad ar tylli ki ATM Card.
Shuh shuh ki pulit ki la ong ba ha kawei pat ka jingjia, u Anup Paul u la ujor ba ha ka 29 tarik Lber ha ka por kumba 9 baje mynstep, u la lap ba ka thuk-thuk jong u, ka bym pat don nombor, ka la jah na Fancy Valley, Tura.
Nalorkata, ki pulit ki la ïathuh ba u Binen T Sangma u la ujor ba ka suloi SBBL ka jong u, kaba la don laisen, ha ryngkat bad ka laisen ki la jah na ka ïing sah jong u ha Simbukolgre, Selsella, West Garo Hills.
