Kyiv, Iaïong:
Ki bor pyniaid ka Ukraine ha ka Sngi Palei ki la iathuh ba ki ‘namding ba la siat da ka Russia ki la leit hap bad pynbthei ia ki shlem pynmih bording jong katei ka ri hajan ka nongbah Kyiv bad ha kiwei ki thaiñ ba marjan.
Kane ka jingshah thombor jong ki shlem treikam ka Ukraine ka long ruh hadien 2 snem ba ka Russia ka la pynjulor ia ka Power Plant ha Trypilska jong ka Ukraine kaba don hajan katei ka nongbah ha ki por ba dang jur bha ka thma.
Katkum ki dur ba la saphriang paidbah, la iohi ia ka tdem kaba rben bad kaba iong ngaiñ kaba kiew shalor suiñ na katei ka jaka ba don katei ka shlem bording jong ka Ukraine ha katei ka sngi.
Haba iadei bad kane, u President ka Ukraine- u Volodymyr Zelensky u la ong ba ka Ukraine ka donkam ban pynkhlaiñ noh ia ka jingiada ha kane ka sien bad ban pynphai ruh ia ka jubab kaba biang sha ka Russia. Hynrei haba iadei bad katei ka jingjia, u Zelensky u la ong ba kitei ki rukom thombor kim shym don jingiapher eiei na ki kam thombor jong ki lehnoh.
Ha kajuh ruh ka por, u Zelensky u la ong ba ka Ukraine ka donkam kyrkieh ia ki tiar iakhun thma bad ka jingkyrshan ba ratbah na ki ri marjan na West khnang ba ka Ukraine kan lah ban iakhun bad ban tehlakam ia kitei ki jingleh don bor bad jingpyni bor jong ka Russia ha kane ka sien.
Namar kata, ka Ukraine ka la pan jingiarap kyrkieh na kitei ki ri ba marjan da ki tiar iakhun nalor suiñ hadien ba ka Russia ruh ka la pynbna ba kan nang pynjur ia ka jingleit hiar thma sha Ukraine da kaba pyndonkam da ki ‘namding kiba khlaiñ bad kiba kham lah ban poi jngai.
Kane ka jingleit thombor biang jong ka Russia ia ki shlem bor-ding ka Ukraine ka la wanrah jingma bad pynsyier ia ka Ukraine ioh ka jingeh kaba khraw kan wan lap biang ia ka kane ka ri kumba long ha ka por ba ka Russia ka hiar thma nyngkong ia ka Ukraine ha ka tlang jong ki snem ba la leit. Na kane ka jingjia la sakhi ba bun na ki bynta jong ka Ukraine ki la hap ban shong dum khamtam hapdeng ka jingkhriat bad jingsop jong ka ior ha katei ka por tlang.
