Shillong, Ïaïong 12
Ka Khasi Jaiñtia Christian Leaders Forum (KJCLF) ka kyntu ïa ki nongshong shnong ka Jylla ban thep ïa ka ‘vote’ da ka jingkitkhlieh bad ban jied ïa ki nongmihkhmat da ka jingshlur bad ka mon ba skhem ha kane ka ilekshon ban wan.
“Ka KJCLF ka pynsngew ïa ka jingkyrsiew thiah kaba sawa ha kane ka ilekshon (2024) bad sa shisien ka kyntu jur ïa baroh ki nongshong shnong ban thep ïa ka ‘vote’ da ka jingkitkhlieh ha ka sngi thep ‘vote’ bad ban ‘vote’ ha ryngkat ka jingïatip lem kaba shai, ka jingshlur bad ka jingshemphang kaba ngi khmih lynti na bynta kaei-kaei kaba thymmai,” la ong u Secretary ka KJCLF, Rev. Dr. E.H. Kharkongor ha ka kyrwoh khubor.
U la ong ruh ba ka kynhun ka kyrsiew thiah na bynta u/ka kyrtong ki ban bat ïa ka jutang ba la khlei – ban shakri ïa ki paidbah ha ka lynti kaba khuid ba suba bad kaba lait na ka jingbamsap.
Ka kynhun ka la ong ruh ba kum ki nongshong shnong ka India, ka dei ka kamram jong baroh kito kiba la ïoh ban thep ‘vote’ ban shim bynta ha ka ilekshon la ka long sha ka ïingdorbar thawaiñ ka Jylla ne Parliament khnang ban rai ïa ka lawei jong ka Jylla bad ka ri lyngba ki Sorkar kiba la thaw bad ba la bynshet kam ban shakri ïa ki paidbah.
“Ka ilekshon 2024 sha ka Lok Sabha ka la wan bad mynta ka wan bad ka jingkyrsiew thiah na bynta ki nongthep ‘vote’ ban ïeng biang sa shisien ryngkat ka jingshai, jingshlur bad ka mon ba skhem ban jied ïa ki nongmihkhmat sha ka Lok Sabha kaba 18,” u la ong.
Ha ka ilekshon jong u snem ba la dep sha ka ïingdorbar thawaiñ ka Jylla, u Rev. Kharkongor u la ong ba ki nongshong shnong ka Jylla ki la pyni ïa ka jingjied jong ki pyrshah ïa kito kiba mihkhmat ïa ka niam, jingbym don mon ban pdiang, jingkulmar bad kiwei-kiwei.
“Hynrei, ka long kaba sngewsih ban ïohi ba ki ‘riew shimet kiba rhah pisa, kyrdan bad bor kiba la pynhiar dor ïalade ha ka kyrdan jong ki mraw ba tad dor haba ki tyrwa ïalade ne shah thied ha ki mraw khaïi ka saiñ pyrthei kiba ïakylliang bad ki paidbah bad bate ïa ki mat jingkular kum ki mar ki mata ha ki jaka ïew,” u la ong.
Shuh shuh u la ong ba ki ‘riew saiñ pyrthei bad ki Sorkar ki la kylla long ki nonglute ha ryngkat ka bamsap, kam be-aiñ, jingkulmar bad ban kput kylla.
“Ki aiñ kiba ktah bad ki ‘Ordinance’ ki la long aiñ, ki hok ka Riti Synshar bad ki jingmyntoi ki shah pynduh noh, ka jingbym don mon ban pdiang bad ka jingisih la shah ba kin treikam khlem ka jingpeitngor,” la ong u Secretary.
Ka kynhun ka pynrem jur ruh ïa ki jingkulmar bad jingisih bad ka khot bad wer na bynta u/ka nongmihkhmat jong ki paidbah ki ban bat la ka jutang ba la khlei – ban pynneh-pynsah ïa ka Riti Synshar ka Ri bad ka jingshakri ïa ki paidbah ka ban synñiang sha ka Sorkar kaba khuid-suba bad kaba lait na ka bamsap.
