New Delhi, Ïaïong 12
U Myntri Rangbahduh ka Ri, u Narendra Modi u la pynïaid ïa ka jingïalang ban peit ïa ka jingpynkhreh na ka bynta ka samoi jingshit ka ban wan.
La pyntip ïa u Myntri Rangbahduh shaphang ka jingantad ïa ka jingkhluit naduh u Ïaïong haduh Jylliew, 2024 ba kynthup ruh ïa ki jingantad ïa ka jinglong-jingman jong ka samoi jingshit (Ïaïong haduh Jylliew), ki jingma kiba lah ban wan na ka jingkiew ka jingshit ha baroh kawei ka ri, khamtam ha ki jaka ba kham shah ktah ha kane kiba long ha ka thaiñ Central India bad Western peninsular India.
Ïa ki jingpynkhreh ha ki kam ai jingsumar la peit ha kaba ïadei bad ka jingdap ki dawai ba kongsan, ki ‘intravenous fluid’, ki ‘ice pack’, ORS bad ka um dih.
Ha kajuh ka por, la ban jur halor ka jingpynbiang ha ka por ba ïahap ïa ki IEC ba kongsan / ki jingai jingtip ha ki ktien tynrai lyngba baroh ki rynsan kum ka – TV, ‘Radio’ bad ki rynsan lad pathai.
Namar ba la antad ba kane ka samoi jingshit kan long kaba kham khluit ha u 2024, kaba hap ruh ha ka por jong ka General Election, ka la don ka jingsngew ba ïa ki jingai jingmut jong ka tnad ka koit ka khiah bad ka NDMA dei ban pynkylla sha ki ktien tynrai bad pynsaphriang ïa kine.
U Myntri Rangbahduh u la ban jur ruh halor ka jingtrei jong baroh kawei ka Sorkar. U la ong ba baroh ki bynta jong ka Sorkar Pdeng, ki Sorkar Jylla, ki bor pynïaid distrik bad ki tnad Sorkar Pdeng ki dei ban ïatreilang ha kane ka kam.
Shuh shuh u Myntri Rangbahduh u la ban jur halor ka jingai jingtip bad ka jingpynkhreh ha ki hospital. U la kdew ruh sha ka jingkongsan jong ka jingithuh mardor bad ka jingtem ïa ki jingpluh khlaw.
Na ka liang u Principal Secretary sha u Myntri Rangbahduh, Secretary ka tnad Kam Pohïing, ki ophisar na ka Indian Meteorological Department (IMD), bad ka National Disaster Management Authority ki la ïashim bynta ha kane ka jingïalang.
