Shillong, Ïaïong 12
U Returning Officer ka 1-Shillong Parliamentary Constituency, u SC Sadhu, uba dei ruh u Deputy Commissioner ka East Khasi Hills, u la ïakynduh ïa ki nongïalam jong ki seng saiñpyrthei bapher-bapher ban ïakren halor ka ilekshon MP Lok Sabha ha ka Sngi Thohdieng.
Na ka liang u Sadhu u la kyntu ïa ki nongïalam jong ki seng saiñpyrthei ban pynneh ïa ka shongsuk-shongsaiñ. U la ong ba ka Meghalaya ka dei ka jylla kaba don ïa ka shongsuk-shongsaiñ bad ha man ki ilekshon, ym ju don satia ki jingjia kiba kumne-kumtai.
U Sadhu u la kyntu ïa baroh ki seng saiñpyrthei ban kyntu ïa ki nongkyrshan lajong ba kim dei ban leit pynthut ïa ki jingïalang jong kiwei pat ki seng. Nalorkata, u la kyntu ba kim dei ban pynsaphriang ïa ki khubor thok lane ki khubor kiba khlem pat wad shwa ïa ki jingshisha.
Nalorkata, u la pynpaw ïa ka jingkyrmen ba ka ilekshon Lok Sabha ha kane ka kynti kan long kaba ïaid beit ïaid ryntih khlem kino-kino ki jingjia.
