Shillong, Ïaïong 12
Katba ki sngi ki la nang ïai tyllun bad ki la nang jan sha ka jingthep ‘vote’ ïa ka ilekshon MP sha ka ïingdorbar Lok Sabha ka ban long ha ka 19 tarik u Ïaïong 2024. Sa shisien pat na ka liang ka Hynñiewtrep Integrated Territorial Organisation (HITO) Student’s Wing, ha ka Sngi Thohdieng ka la leit ban pynlong ïa ka jingpynsngewthuh paidbah ha kaba ïadei bad ka jingkordor jong ka ilekshon MP bad kum ki nongshong shnong jong ka jylla ki dei ban thep ruh ïa ka ‘vote’ jong ki da kaba puson bha khnang ba u kyrtong u ban long kum u MP u dei ban long uta u nongmihkhmat u ban wanrah ïa ka roi ka par, ka bha ka miat bad ban pynsngew ruh ïa ki mat ki jura jong ki paid Khasi bad Jaiñtia hapoh ka Parliament.
Kum ban shu kdew hangne, na ka liang ka HITO Student’s Wing ka la sdang nyngkong eh ïa kane ka jingpynsngewthuh paidbah ha ka 6 tarik u Ïaïong 2024 sha ki khynnah pule napoh ka phyllaw jong ka St Edmund’s College bad ter-ter sha ki surok kiba don ha ki thaiñ Laitumkhrah, Shillong.
Kumta na ka liang ka seng, ha ka Sngi Thohdieng pat ka la leit ban pynsngewthuh paidbah sa sha ki bynta jong ka Don Bosco Square ha Laitumkhrah bad kumjuh ruh hapoh ka phyllaw jong ka St. Anthony’s College.
Na ka liang ki khynnah pule ki pynpaw ba kum ki samla ki kwah ba kitei ki MP kin phai khmat bha ha ka liang jong ki samla ha ka liang ban thaw ïa ki lad ai kam ai jam, ban kyntiew ïa ka pule puthi hapoh ka jylla ha ki liang baroh kaba kynthup lang ruh ïa ka jingkyntiew ïa ka tulop jong ki nonghikai namar khlem ki nonghikai kum ki khynnah pule kin nym long satia kumba ki long mynta bad kum ki kyrtong ki dei ban wanrah ruh da ki aiñ ki ban ïada ïa ka Ri bad ka Jaitbynriew.
Nangta na ka liang kitei ki samla ki la ong ruh ba kane ka dei ka khyllipmat kaba khadduh ban jied da u nongmihkhmat uba pyrkhat na ka bynta ki paidbah ym shuh tang na ka bynta ïalade shimet.
“Kaba nyngkong eh kum ki khynnah pule, ngi kwah ban pynthymmai noh ïa ka rukom treikam ka pule-puthi namar kumba ka long mynta, ka jylla ka la hiar bha bad la ïohi ruh ba ki don shibun ngut ki briew hangne kiba la nang la stad hynrei kiba don hapdeng ka jingjynjar kam suda”, la ong kitei ki samla pule.
Na ka liang ki paidbah pat ki la ong ba kum ki nongmihkhmat ki dei ban long kiba bat ïa ka kyntien kaba ki la khlei. Hynrei lada kim leh kumta kan myntoi aïu ïa ki paidbah ba kin thep ïa la ka ‘vote’.
“Lada um leh kumba u la kular kan myntoi aïu ba ngin thep ïa ka ‘vote’ namar ka jingthep ïa ka ‘vote’ ka dei ka mon ba laitluid jong ngi bad ngi lah ruh ban ‘vote’ da u NOTA namar ngin pynlehnohei leh aïu ïa ka ‘vote’ jong ngi, ngi dang lah ba shong ha ïing,” la ong ki paidbah.
Shuh shuh na ka liang ki paidbah ki la ong ba kum ki nongshong shnong ka jylla ki kwah ba ka lawei bad ka pateng ka ban sa wan kan long ka lawei kaba phyrnai ym shuh kumne ka por kaba mynta kaba ki paidbah ki shem jingeh ha kat kaba don bad ba ka rukom synshar-khadar kam dei ban long kaba bamsap-bampong hynrei ka ban khmih ïa ka jylla ha ka lynti kaba dei.
