Ranchi, ïaïong:
Kum ka jingïoh ïa ka jingjop na ka bynta ka kynhun jong ki shipai ïada ri hashwa ka ilekshon Lok Sabha, ki la don kumba 15 ngut ki lehnoh Maoist, kynthup ïa uwei uba dang poh rta bad arngut ki longkmie, kiba dei jong ka kynhun u lehnoh ba la kwah ban kem u Misir Besra ki la leit ban pyndem ïalade ha West Singhbhum distrik jong ka Jharkhand ha ka sngi Palei, la ïathuh ki pulit.
Kine ki lehnoh ki la treikam ha Saranda, kaba don ha ka jaka khlaw ba rben jong ka thaiñ Kolhan ha ka bynta ba shaphang Shathie jong ka Jharkhand ha kaba ki shipai ïada ri ki la pynjur ïa ka jingleit thwet lehnoh ban ïakhun pyrshah ïa ki.
“Ki la don kumba 15 ngut ki lehnoh Maoists kiba la leit ban pyndem ha ka sngi Palei. Kine ki la treikam na Saranda bad ki dei ki dkhot jong ka kynhun u Misir Besra jong ka CPI, uba la shah thong ha ka khlieh jong u da T. 1 klur,” la ïathuh u heh pulit.
Ka West Singhbhum ka la shah ñiew ba ka la long kawei na ki distrik ha ka ri kaba la shah ktah jur ha ki kam pyntriem jong ki lehnoh. Kane ka distrik, ka la sakhi ba ki la don kumba 46 tylli ki kam pyntriem jong ki lehnoh Maoist ba la jia, ha kaba kane ka la pynlong ïa ki 22 ngut ki briew ba kin shah pynïap ha u snem ba la leit.
“Ka la long ka jingjop kaba khraw bad kan sa ïarap ha ka ban pynlong ïa ka ilekshon kaba ïaid beit ïaid ryntih ha Singhbhum konstitwensi bad lait na kino kino ki jingap jingma jong ki kam pyntriem ki lehnoh,” la ong u Deputy Commissioner jong ka West Singhbhum u Kuldeep Chaudhary ha ka jingïakren bad ki nongthoh khubor.
