Shillong, Ïaïong 12
U MLA ka Voice of the People Party (VPP), Bah Brightstarwell Marbaniang, u la kyntu ïa ka shnong Mawlai Syllaikariah ba kim dei ban ‘Boycott’, hynrei ki dei ban leit thep ‘vote’ da kaba ñion baroh shi shnong ha ka shap jong u ‘Prah’ ban pyni sha ka sorkar jylla ïa ka jingleh kuman halor ka jingeh ka shnong.
Kane ka jingkren u MLA ka VPP na Mawlai ka dei hadien ba ka shnong Syllaikariah ka la byrngem ba kan nym ïashim bynta ha kane ka ilekshon namar ba ka sorkar kam suitñiew ïa ka shnong jong ki naba kam shym la shna ïa ka surok naduh ba la wan tih ka tnat PHE ban thep pipe um.
Haba leit pan jingkyrshan ïa u kyrtong ka VPP, Dr Ricky A.J. Syngkon kaba la long ha ka Sngi Thohdieng janmiet, u Bah Brightstarwell u la ong ba lada ka shnong Syllaikariah ka la thait la ngiah ïa kane ka sorkar ki dei ban mih paidbah ha ka 19 tarik mynta u bnai ban thep ïa ka ‘vote’ jong ki ha u kyrtong ka seng VPP khnang ba kin nym ap khmih lynti shuh ïa ki kam pynroi na ka sorkar jylla. hynrei ba kin ïoh ki jingmyntoi na ka sorkar pdeng.
Nalor kata, u Bah Brightstarwell u la jubab ruh ïa ka jingkylli u Bah Prestone Tynsong, bad kumta u la kyntu ïa u ban ai ïa ka bor ha ka VPP ban shong ha ka sorkar hangta kan sa jubab katno inshi ban shna surok.
