Nongstoiñ, Ïaïong 12
U Deputy Commissioner, West Khasi Hills District, Bah Garod L.S.N. Dykes, IAS, u la pyntip sha ki paidbah baroh namar ka ilekshon sha ka ïingdorbar thawaiñ Lok Sabha, 2024 ka ban sa long hapoh ka Jylla bad ka Ri baroh kawei, bad katkum ka bor kaba la pynkup hapoh ka kyndon 324-A jong ka M.E. Act, 1945 u la pynbna ‘sngi tyrkhong kyiad’ ha baroh kawei ka distrik.
Ha ka kyrwoh khubor ba la phah, u Deputy Commissioner ka West Khasi Hills u la ong ba katei ka sngi tyrkhong kyiad kan sdang naduh ka 17 bad 18 tarik, u Ïaïong 2024, kiba dei ki sngi shuwa ban thep ‘vote’, nangta ha ka 19 tarik u Ïaïong 2024, kaba dei ka sngi thep ‘vote’ kumjuh ha ka 4 tarik u Jylliew 2024 kaba la pynbna kum ka sngi ñiew ‘vote’.
Na ka liang jong u DC u la bthah ïa baroh ki dukan die kyiad kaba kynthup naduh ki IMFL “OFF”/ “ON”/Canteen/Bonded Warehouse kin khang ban die kyiad ha kitei ki sngi.
