Shillong, Ïaïong 12
U Myntri Rangbahduh ka Ri, u Narendra Modi u la ñiew-tang ïa ki kam kiba la leh ha Meghalaya ha kaba u la ai jingïaroh ruh ïa ka Jylla ba ka pyntreikam ïa ki skhim bapher-bapher bad long ka nongïoh myntoi ha ka liang ki kam pynroi.
La ong ba ka thaiñ Shatei Lam Mihngi ka la long ka kaba kham duna ka jingphai khmat ha ki snem kiba la mynshwa hynrei la sakhi ba don ka jingkylla naduh ba shimti u Modi kum Myntri Rangbahduh ka ri ha u snem 2014.
La ong ba ka jingieh beiñ la pynkut ha ka por jong ka Sorkar ba ïalam u Modi bad kyntiew ïa ka North East sha ka bynta kaba donburom bad kaba kham phaikhmat hapoh ka rukom treikam jong ka ri.
U Modi u la ñiew-tang ruh ïa ka jingpyntreikam ïa ka skhim PM Garib Kalyan Anna Yojana kaba ai khaw ei sha ki 80 klur ngut ki nong India ha kaba ki don 21 lak ngut kiba ïoh myntoi ha Meghalaya haduh u Nohprah 2023.
Haba ïadei bad ka skhim umbam-umdih la ong ba ka Sorkar u Modi ka la pynleit jingmut ban pynïoh um lyngba ka skhim Jal Jeevan Mission kaba ka thong ka long ban ïoh um sorkari haduh phyllaw ïing ha kaba ha Meghalaya ki la don 4.85 lak tylli kiba la ïoh um ha Meghalaya kaba long 75 na ka 100 bad ha u snem 2019 ka long tang 0.7 na ka 100.
La ong ba la tei shuh ruh sa 3 lak tylli ki jaka leit bar hapoh ka Swachh Bharat Mission (Grameen), jan kot 2 lak tylli ki longïing kiba la mang hapoh ka PM Awas Yojana bad kumba 1.88 lak tylli ki ïing ki dei ha nongkyndong.
Haba ïadei bad ki surok, la ong ba palat 379 km ki surokbah (National Highways) la shna ha Meghalaya katba 170 km ki surokbah (National Highway) kiba kot sha ka jingmang pisa T. 2,700 klur la dep ban mynjur hapoh ka Bharatmala Pariyojana.
La ong ba ka Meghalaya ruh ka la rung ha ka ‘map’ jong ka tnat rel da ka jingtreikam ka Dudhnoi-Mendipathar railway line ha u snem 2014. Ka Jylla ka la ïoh ruh ïa ka rel ilektrik kaba nyngkong ha u snem 2023 kaba dei jong ka Bongaingaon-Dudhnoi-Mendipathar. Mynta ka jaka sangeh rel ha Mendipathar ka dang don ha ka lynti ban pynbha shuh shuh hapoh ka skhim Amrit Bharat.
Shuh shuh ha ka 9 tarik Lber, 2024, u Modi u la plie bad buh mawnongrim ïa bun tylli ki projek kiba kot palat ` 290 klur ha Meghalaya nalor 14 tylli ki projek kiba kot sha ka ` 569 klur hapoh ka North East Special Infrastructure Development Scheme (NESIDS).
